Mette Frederiksen: Isumatigiissutit oqallisigeqqinnissaat nalinginnaalluinnarpoq
Issittumi nakkutilliinissamut tunngatillugu isumaqatigiissutini 1,5 milliardit koruunit isumaqatigiinngissutigineqarnerat nunanut allanut tunngasunut naalakkersuisup, Pele Brobergip (N) ataasinngormat tunuarsimaassutigisaa nanginneqarpoq.
Taassuma isumaqatigiissutit Naalakkersuisunit nutaanit taperserneqannginnerarpai – taakkulu Danmarkip nunarput qulangerlugu isumaqatigiissutigigai oqaatigalugu.
1,5 milliardit koruuninik Issittumi nakkutilliinerunissamut aningaasaliineq
Folketingip illersornissaq pillugu isumaqatigiissutitaaq 2018-imi akueraa. Saniatigut 4,8 milliardit koruuninik Illersornissaqarfimmut 2023-p tungaanut aningaasaliinissaq isumaqatigiissutaavoq.
Partiit illersornissaq pillugu isumaqatigiissusiortut sualummik Atlantikup Avannaani Issittumilu 2023-p tungaanut nakkutilliinerunissamut saniatigut 1,5 milliardit koruuninik 2019-imi aningaasaliipput.
Isumaqatigiissummut aningaasaliissutit 1,5 milliardit koruuniusut affaat - tassa 750 millionit koruunit - timmisartuaqqanik ungasianiit aquttakkanik nunatsinni nunami nakkutilliissutaasussanik marlunnik pisinermut ingerlatsinermullu atorneqassapput.
50 millionit koruunit Kangerlussuarmi sakkutuunngorniarfissamut atorneqassapput.
390 millionit koruunit Savalimmiuni silaannakkut aalerinaarinissamut radarimut atorneqassapput.
- Kalaallit Nunaanniit peqataanani isumaqatigiissusiaavoq, isumaqatigiissuna Kalaallit Nunaannut tunngaannartoq, Pele Broberg KNR-imut ataasinngormat oqarpoq.
Pele Brobergip oqaaseqarnera ministeriunerup Mette Frederiksenip ullumi aamma oqaaseqarfigaa.
AAMMA ATUARUK Naalakkersuisut dumper forsvarsaftale til 1,5 milliarder
Naalakkersuisunimmi nutaanik Namminersorlutik Oqartussat Nuummi allaffeqarfiannut nuuttoqaraangat issittumi pisinnaasat oqallisigineqaqqinnissaat ”nalinginnaalluinnartuuvoq”, danskit ministeriunerat, Mette Frederiksen Múte B. Egedep taakkulu suleqataata savalimmiormiup peqataaffigisaanni naalagaaffeqatigiinni ataatsimiinnerup kingorna tusagassiortunik katersortitsinermi oqarpoq.
- Nutaanik naalakkersuisoqaleraangat nalinginnaasuuvoq. Pisinnaasat oqallisigileruttorpagut, qularutiginngilara pitsaasumik aaqqiissuteqassasugut, Mette Frederiksen oqarpoq.
Timmisartuaqqat inuttaqanngitsut nakkutilliinerlu
Nakkutilliinissamut isumaqatigiissut 1,5 milliardit koruuninik aningaasartaqartoq februaarimi akuerineqarpoq.
Tamanna Kim Kielsen (S) siuttoralugu Naalakkersuisuusimasut suleqatigineratigut isumaqatigiissutigineqarpoq.
Isumaqatigiissutit Danmarkip Issittumi Atlankikullu avannaani timmisartuaqqat inuttaqanngitsut atorlugit nakkutilliinissaanut Kangerlussuarmilu illersornissamut ilinniarfeqarnissaanut ilaatigut pitsanngorsaataassapput.
AAMMA ATUARUK Siumup Pele Broberg mianersoqqugaa: Avissaartuutitseqinak
Isumaqatigiissut taanna nunanut allanut tunngasunut naalakkersuisup, Pele Brobergip (N) tunuarsimaarnerata kingunerisaanik tusagassiuutitigut sapaatip akunnerani matumani aamma sammineqangaatsiarpoq. Tamanna siullermik TV2-mut sapaatiummat oqaaseqarnerani pivoq – tamannalu KNR-imut ataasinngormat aamma oqaatigaa:
- Suliassatta annersaraat qallunaat naalakkersuisui paasitissallugit, naalakkersuisoqalersoq nutaanik, anngaaginnanngitsunik. Uagullu innuttaasugut sullikkatsigit.
Sakkutuunut atornagit inunnut atorneqarnerutillugit
Naalakkersuisut siulittaasuata, Múte B. Egedep oqarnera naapertorlugu nakkutilliinissamut isumaqatigiissutit oqallisigilluaqqinnissaanut pissutissaqarpoq.
Taassuma Pele Borbergip isumaqatigiissutit sakkutooqarnermut tunngannginnerullutik innuttaasut tunnganerunissaanik oqarnera taperserpaa, Naalakkersuisummi nutaat sakkutuunik amerlisaaneranit naalakkersuisut siuliinit tunuarsimaarnerupput.
AAMMA ATUARUK Atassut Pele Brobergip naalagaaffeqatigiinni suleqatigiinnerit pillugit oqaasiinut isumaqataanngitsoq
- Oqaloqatigiinneq ingerlalluarlunilu pitsaavoq, Múte B. Egede danskit politikeriisa suleqatiginerat pillugu Mette Frederiksenip saniani qeqqisimalluni oqarpoq.
- Assersuutigalugu Kangerlussuarmi illersornissamut ilinniarfik upalungaarsimanermut ilinniarfinngortinneqarsinnaavoq, naalakkersuisut siulittaasuat oqarpoq.
Timmisartuaqqanik inuttaqanngitsunik nakkutilliineq avatangiisinut silap pissusianullu aamma atorneqarsinnaasoq isumaqarpoq.
- Issittup eqqimasisimanartuutinnerata attanneqarnissaa pingaarluinnarpoq, Múte B. Egede oqarpoq.
