Siumup Pele Broberg mianersoqqugaa: Avissaartuutitseqinak
- Avissaartuutitsilinnginnissani mianersuuttariaqarpaa. Suleqatiginninnermik, ataqqeqatigiinnermik tatigeqatigiinnermillu tunngaveqartariaqarpoq. Avissaattuuttariaqanngilagut – neriuppungalu, naalakkersuisoqatigiit tamanna pimoorutissagaat.
Siumup siulittaasua, Erik Jensen nunanut allanut naalakkersuisoq pillugu, taama oqarpoq. Erik Jensimi isumaqarpoq naalakkersuisuusimasut isumaqatigiissusiaat, Pele Brobergip tunuarsimaarfigiinnarsinnaanngikkaa.
AAMMA ATUARUK Naalakkersuisut: 1,5 milliardit uagut susassarinngilagut
Sapaatiummat TV2-miinnermini, issittumi suliaqarnerunissamut isumaqatigiissut 1,5 milliardinik nalilik tunuarsimaarfigileriataarpaa, taamaasillunilu eqqartorneqassutigingaatsialerlugu.
Anngaaginnarsinnaanngilagut
Februarimi naalakkersuisuusimasut isumaqatigiissutigisimagaluarpaat, issittumi suliaqarnerunissamut isumaqatigiissummi, Danmarkip issittumi Atlantikullu avannaani najuunnera annertunerulissasoq.
1,5 milliardit koruuninik Issittumi nakkutilliinerunissamut aningaasaliineq
Folketingip illersornissaq pillugu isumaqatigiissutitaaq 2018-imi akueraa. Saniatigut 4,8 milliardit koruuninik Illersornissaqarfimmut 2023-p tungaanut aningaasaliinissaq isumaqatigiissutaavoq.
Partiit illersornissaq pillugu isumaqatigiissusiortut sualummik Atlantikup Avannaani Issittumilu 2023-p tungaanut nakkutilliinerunissamut saniatigut 1,5 milliardit koruuninik 2019-imi aningaasaliipput.
Isumaqatigiissummut aningaasaliissutit 1,5 milliardit koruuniusut affaat - tassa 750 millionit koruunit - timmisartuaqqanik ungasianiit aquttakkanik nunatsinni nunami nakkutilliissutaasussanik marlunnik pisinermut ingerlatsinermullu atorneqassapput.
50 millionit koruunit Kangerlussuarmi sakkutuunngorniarfissamut atorneqassapput.
390 millionit koruunit Savalimmiuni silaannakkut aalerinaarinissamut radarimut atorneqassapput.
Danskit illersornissamut ministeriata, isumaqatigiissut saqqummiunneqarmat oqaatigaa, isumaqatigiissut Kalaallit Nunaat peqatigalugu suliarineqarsimasoq. Taannami ima oqarmat:
- Savalimmiormiunik kalaallinnillu qanimut suleqarsimaneq, danskit naalakkersuisuinut pingaaruteqarsimavoq, taama Trine Bramsen oqarpoq.
Pele Brobergili ataasinngormat KNRimit oqaloqateqarnermini allatut misigisimavoq. Taassuma ilaatigut eqqaavaa, Naalakkersuisut nutaat nunarput sakkulersorfiunnginnissaa kissaatigaat.
- Danskit politikeriisa isumaqatigiissut akornaminni namminneq isumaqatigiissusiaraat. Tunngaviatigut maanngaanniit ilassuteqarfigineqarnikuunngilaq. Kalaallit Nunaanniit peqataanani isumaqatigiissusiaq suliaavoq, taamaallaanuna isumaqatigiissut Kalaallit Nunaanut tunngaannartoq, Pele Broberg KNRimut taama oqarpoq.
- Suliassatta annersaraat qallunaat naalakkersuisui paasitissallugit, naalakkersuisoqalersoq nutaanik, anngaaginnanngitsunik. Uagullu innuttaasugut sullikkatsigit.
Taamaattoqarsinnaanngilaq
Taamatut oqaannartoqarsinnaanngilaq, Erik Jensen aalassassimaarluni oqarpoq.
- Soorunami uanga naalakkersuisut qanoq isumaqatigiinniartarsimanersut siuliilu ilisimanngilakka. Kisianni taamatut oqarneq isumaqarpunga ingasappallaarujussuartoq, tassami tikkuartuineq kiisalu allanik pisuutitsisaqattaarneq taanna oqippallaarujussuartutut isumaqarfigaara. Akisussaaffik nammineq tigullugu qanoq iliuuseqarnissaat taanna pingaarnerpaarpaajusariaqarpoq. Soorunami namminneq qanoq oqaloqatigiinnissaat uagut akuleruffigissanngilarput, anngaaginnartunik uanga naalakkersuisoqarsimaneranik uanga ilisarisaqarsinnaanngilanga
Siumut siulittaasuata, illersornissamut isumaqatigiissut, Kalaallit Nunaannut nutaartaasuulluarsoraa.
- Isumaqaratta Kangerlussuarmi suliffinnik pilersitsineq aammalu ineriartortitsinissamik aqqutissiuussineq nutarteriniarnerillu mittarfiullu iluarsartuunneqarnissaanut aamma aningaasat atorneqartussat hangarinullu tunngassuteqartut tamakkua unitsinneqassappata soorunami taanna uggornartortaqartipparput.
AAMMA ATUARUK Atassut Pele Brobergip naalagaaffeqatigiinni suleqatigiinnerit pillugit oqaasiinut isumaqataanngitsoq
Kangerlussuarmi illersornissamut ilinniarfeqarnerup Kalaallit Nunaata nakkutilliinissaminut iluaqutigissagaluarpaa, taama naliliivoq.
- Kalaallit Nunaat nammineerluni nakkutilliinermik tigummiaqassagaluarpoq.
