VIDEO Mersortartoq: Kalaallisuuliornermi nalunngisat siammarterneqarlik

83-inik ukioqarneq uniffiunngilaq mersortartuugaanni kalaallisuuliornermillu suliaqarnermik nuannarisaqartuugaanni. Petrine B. Isbosethsenip nerrivia suli amernik, sapannganik, meqqutinik ujalussianillu ulikkaarpoq.

Allattoq Sika Frederiksen, Tikaajaat Kristensen

februaarip 24-at 2015 19:04

Sulimi imitiinnavippoq.

- Imittoqartarpoq inuusuttunnguit soorlu naammassissagama atuarninni, GU-mi, kalaallisuukka eqqumiippoq iluarsaatilaarsinnaavigit allilaarlugit? Petrine B. Isbosethsen kalaallisuuliortartoq KNR-imut oqarpoq.

Aamma atuaruk Kalaallisuut inuusuttut soqutigilluarpaat

1953-imi katippoq meeqqiulerlunilu, tamassumalu kingorna kalaallisuuliorneq ilikkarusulerpaa.

- Ima eqqarsarpunga, ikiortissaqanngilanga kisimiikkama, saaffiginnippunga taamaasillunga tassa ilinniarfigivakka tamakkua kursusertitsisartut pikkorissut, oqaluttuarpoq.

Pikkorissut ataqqinartut

Maanna Sisimiuni kalaallisuuliornermik ilinniarfeqarpoq, Petrine B. Isbosethsenilli kissaatigigaluarpaa illoqarfinni allani aamma ilinniarneqarsinnaassasoq.

- Tamaani taamatut kursuserfimmik peqartuugaluaruni soorlu assorujussuaq kursuserfigalugu pittaassagaluartoq. Aamma ilinniartariaqaraluarpaat illoqarfinni sumiluunniit suliassaqartitsinermut tunngatillugu pisariaqarsoraara ilinniarfeqarnissaa.

- Qaqutigoortumik massakkut pikkorissoqaleratta tamakkulerinissamut. Ataqqisarpakka, aamma massakkut ataqqivakka tamakkua kursusertitsisartut kalaallit mersugaataannik. Assorsuaq pissarsiffiginikuuakka, Petrine B. Isbosethsen oqarpoq.