Meeraq aneerasaartarfimmit nakkartup ataataa qulaatiinnarneqartutut misigisimavoq

Suliamut tunngasunik tusagassiutitigut taamaallaat tusartarluni,  Elias Ole Inûsugtok oqarpoq.

Ajutoornermut alianartumik kinguneqangajattumut kikkut akisussaasuunersut taavalu assigusumik pisoqaqqinnginniassappat qanoq iliortoqarniarnersoq ilaqutariit paaseruppaat, inuttullu ingerlariaqqinniassagamik utoqqatserfigineqarumapput.

Nukappiaqqap aneerasaartarfimminngaanniit nakkarnerata kingorna, aneerasaartarfiit meeqqanut navianaallisarlugit aallartinneqarput, juullinnginnerani naammassineqarnissaa ilimagineqarluni.

Inissiat suliarineqarnerlussimanerat pillugit suli akisussaaffimmik tiguserusuttoqanngilaq. Suliaalli taama inissisimalersimanera Nukappiaqqap aaneerasaartarfimminngaanniit nakkartup ataataata, Elias Ole Inûsugtok tusagassiutititugt taamaallaat tusarpaa.

- Uanga tassa tusarpara ilinniartuutinninngaanniit, oqarlutik erninnguarsi radioaviisikkoorneqarami. Taava aatsaat kingorna misissorpara tusarnaarlugulu ilumut ippassaammat radioaviisikkoorsimasugut, Elias Ole Inûsugtok taama oqarpoq.

Taannalu qulaatiinnarneqartutut misigisimavoq, suliallu killiffianik tusagassiutini sapaatit akunneranni kingulermi tusarami tupappoq.

- Tupannarpoq, aallaqqaammut angajoqqaatut uanga nammineq tupappunga, pissutigalugu oqaluttuaannaanersoq nalugakku. Upperissavara? Pisortatigoortuuguni soormi pisortaninngaanniit uagut ilisimatinneqanngilagut suliaq aallartinneqartoq, meeqqap aneerasaaartarfimmit nakkartup ataataa taama oqarpoq.

Ilaqutariillu malinnaatinneqartuugunik inuttut alloriaqqinnissamut piareernerussagaluartut, Elias Ole Inûsugtup qularutigingilaa.

- Uagut aamma nammineerluta alloriaqqittariaqaratta ilaqutariittut inuttullu. Avataaninngaanniit sunaluunniit tusagaq iluamik uppernarsitinnagu upperiuminaassinnaasarami. Ingammik ernitta nakkarnerata kingorna tusagassiutitigut, allatigullu attaveqaatitigut sineriaq tamarmi qisuariarpoq. Kisianni piviusoq qiviaraanni uagutsinni iluamik qisuariarfigineqanngilagut, Elias Ole Inûsugtok taama oqarpoq.

Taassuma ilanngullugu oqaluttuaraa, ilaqutariit naliginnaasumik  inuuneqaqqilersimasut, ernerallu meeqqerivimmiittalersimalluni. Rigshospitalimili piffissami qaninnermi misissorteqqittussaavoq.

Ataataasup Ini A/S Komuneqarfik Sermersuumi teknikkikkut immikkoortortaqarfia politiinut suliassanngortinnikuuaa.