Meeqqat kigutigissut amerliartuinnarput
Peqatigiiffik naapertorlugu kisitsisit pitsaasut taakku nunatsinni kigutigissaasut 2007-miilli Københavns Tandlægehøjskolep suleqatiginerannit pipput, suleqatigiinneq Cariesimut 2018-ip tungaanut immikkut suliniuteqarneruvoq meeqqat inuusuttullu siullermit kigutaasa putoqannginnerunissaannik siunertaqartoq.
Suliniuteqarneq meeqqat kigutaannik ilaartuisarnerinnakkut ajornartorsiutip qaangerneqarsinnaanaviannginneranik eqqarsarnermik tunngaveqarpoq - ilaatigut nunatsinni kigutigissaanermik suliaqartut amerlanerpaartaat piffissami sivikitsuinnarmi, soorlu qaammatit pingasut arfinillillu akornanni nunatsinni sulisuusarmata.
Taamaattumik pinaveersaartitsinermik suliniummi kalaallit kigutigissaasut qitiutinneqarput. Suliniut pitsaasumik kinguneqarpoq, suliniummi nakkutiginnillutik allattuiffimmi tamanna erserpoq. Meeqqat arfinillik qaammateqaleraangata suliniut aallartittarpoq, meeqqallu kigutileriffiliarnerini qulingiluariarlutik malinnaaffigineqartarput - meeqqat ataatsip missaanik ukioqalerneraniit 15-iliinissaata tungaannut.
Maannalu paasinarsivoq, kigutit putoqalinnginnissaannik siuliutip aallartinneraniit meeqqat kigutiginnerulersimasut.
Naatsorsuinerup takutippaa meeqqat 2012-imi pingasunik ukiullit 76 procentiisa kigutaat putoqarsimanngitsut, 2008-imilu meeqqat pingasunik ukiullit 64 procentiinnaasa kigutaat putoqarsimanngitsut. Aammalu meeqqat 2012-imi qulingiluanik ukiullit 65 procentiisa kigutaat putoqanngillat meeqqallu 2008-imi qulingiluanik ukiullit 57 procentiinnaasa kigutaat putoqanngitsut.
