Meeqqat illersuisuata nakkutilliisut nalunaarusiaat tupaallaatigaa
Nalunaarutip kommunip meeqqanik inuusuttunillu angerlarsimaffiup avataanut inissiisarnermi pinngitsaaliissummillu aarsaarinnittarnermut suliaqartarnerat isornartorsiorpaa. Meeqqat illersuisuata Aviâja Egede Lyngep nalunaarutip inerniliissutai tupaallaatigai:
- Oqartussat alianartuni ajorluinnartuni pisoqarfinni (…) meeqqat sumiginnarneqareersimasut sumiginnaqqikkaat nakkutilliisut nalunaarutaata takutippaa, Aviâja Egede Lynge allappoq.
AAMMA ATUARUK Sermersuumi meeqqat pisortanit sumiginnagaapput
Illoqarfiit pingaarnersaanni kommunip meeqqanik inuusuttunillu ajornartorsiuteqartunik nakkutiginninnermikkut isornartorsiorneqarnerata, kalaallit kommunii alianarluinnartumik oqaluttuassartaleraat, Aviâja Egede Lynge isumaqarpoq.
- Kommuneqarfik Sermersuup Naalagaaffiit Peqatigiit Meeqqat pillugit isumaqatigiissutaat arlallit nunatta atortussanngortinnikuusaat malinngikkaat takutinneqarpoq, Aviâja Egede Lynge oqarpoq, kommunillu allat suliassaqarfimmi tassani ingerlatsinerisa aamma isornartorsiorneqarsimanerat innersuussutigai.
AAMMA ATUARUK Allakkat ernumalersitsisut
AAMMA ATUARUK Suliassaqarfik aningaasalerneqangaatsiarsimasoq isornartorsiorneqartoq
Meeqqat inuusuttullu aamma naapertuutinngitsuliorfigineqartut nakuuserfigineqartartullu kommunip ilisimagaluarlugu akuliutinngittarnerat Nakkutilliisut aamma ilaatigut isornartorsiorpaat. Tamanna nalunaarummi pisortat sumiginnaaneratut taaneqarpoq.
- Tamanna marloriaammik sumiginnaanermik uanga taaniarpara, meeqqat illersuisuat oqarpoq, kommunilu isornartorsiutigineqartunut iliuuseqartariaqarnerarlugu.
- Oqartussat akornanni annertuumik arlalitsigut piginnaasatigullu pitsanngorsaanikkut suleqatigiittoqartariaqarpoq. Saniatigullu Kommuneqarfik Sermersuumi meeqqat ilaqutariillu suliniutigineqarfigineqarnerat ataatsimoortumik piffissamullu sivisunerusumut pitsaasumik suleriaasissamik suliaqartoqartariaqarluni, Aviâja Egede Lynge naggasiivoq.
AAMMA ATUARUK Kujallermi meeqqat naligiimmik ikiorneqanngillat
AAMMA ATUARUK Store mørketal for overgreb i Kujalleq
