Norgemi DM-ertoqarnerani kalaallit ujaminnattorpassuit
Kalaallit ujakkaartartut Danmarkimi pissartanngorniuttoqarnerani Norgemiittumi Kvitåvatn Fjellstogemi ulluni makkunani ingerlanneqartumi ujaminnaqqinnerusinnaapput. SSP Arpattartut tusagassiuutinut taama nalunaaruteqarput.
Allattoq Sara K. Jakobsen
februaarip 02-at 2017 10:40
SSP-ermiut Sisimiuneersut qulit NSP-ermiullu Nuummeersut marluk pissartanngorniuteqataapput.
Anngunniunnerit pingasut naammassereerput marlulli amigaataallutik.
SSP-meersut aqqanilinnik kuultinnapput, qulingiluanik sølvinnallutik sisamanillu bronzennallutik.
AAMMA ATUARUK NSP-meersoq ujakkaarluni DM-ertoqarnerani ajugaasoq
NSP-meersoq 16-iinnarnik ukiulik Bjarne Hansen angutini isorakitsumut ujakkaarnermi 20 kilometerinillu isorartutigisumi duathlonimi kuultinnappoq Sukuutserlunilu isorakitsumi sølvinnalluni.
Ujakkaartartut ullumi qasuersaarput. Aqagumi kilometerimi ataatsimi arfinilikkaarlutik stafetissapput, affai qangatut affaalu sukuutserlutik.
Pissartanngorniunneq kingulleq arfininngorpat ingerlanneqassaaq.
