Martha Lund Olsenip sinniisussaa toqqarneqartoq
Isumaginninnermut naalakkersuisuusimasoq Martha Lund Olsen Kommuneqarfik Sermersuumi Meeqqanut Ilaqutariinnullu Ingerlatsivimmi decembarip aallaqqaataani pisortanngussaaq.
Taamaammat kommunalbestyrelsimit oktobarip pingajuanit atuutilersumik sulinngiffeqarnissanimik qinnuteqarpoq, Kommuneqarfik Sermersooq tusagassiorfinnut nalunaaruteqarluni taama ilisimatitsivoq.
Martha Lund Olsenip kommunalbestyrelsimit ilaasortaajunnaarnissani ima tunngavilersorpaa:
- Matumuuna 3. oktober aallarnerfigalugu kommunalbestyrelsimit sulinngiffeqarnissannut qinnuteqarpunga, atorfimmut atorfigilikkannut atatillugu kommunalbestyrelsimi sulininnut suliamut attuumassuteqarpallaartutut isigineqarsinnaanera peqqutigalugu.
Jens Kristian Berthelsen Martha Lund Olsenimut paarlattaassaaq. Siumut sinniisuisa allattorsimaffianni sinniisuni siullersaavoq.
Martha Lund Olsenip ataatsimiititaliani siulersuisunilu ilaasortaaffii qanoq inuttalersorneqassanersut Siumumit aalajangerneqassaaq. Aningaasaqarnermut inuussutissarsiornermullu ataatsimiititami ilaasortaaffeqarpoq kiisalu
meeqqanut ilaqutariinnullu ataatsimiititami sinniisuulluni. Aammattaaq Kulturimik siuarsaanermut siunnersuisoqatigiinni, Aningaasaateqarfik Sermermik taagorneqartumi, ilaasortaavoq.