Martha Lund Olsenip ilisimatusarfimmi piumasaqaatit sukaterneqarneri isornartorsiorpai
Piumasaqaatit sukaterneqarnissaat sooq pisariaqarnersut, rektorip Tine Parsip Ilisimatusarfiup nittartagaani isummersorluni erseqqissarpai.
- Ilisimatusarfimmi pitsaasumik ilinniakkamik aallussiniaraanni ilinniarnertuunngorniarfimmi ilinniarluaqqaarnissamik piumasaqaatitaqarpoq, ilinniartut ilisimatusarfimmi ilinniakkaminnik naammassinninnissaannik periarfissiisumik, Ilisimatusarfimmi rektori, Tine Pars, Ilisimatusarfiup nittartagaani taama allappoq.
Aamma atuaruk Sukaterinikkut ilinniakkaminnik naammassinnittartut amerlinissaat qulakkeerniarneqartoq
Oqaatsit pingaarnerpaapput
Atuarunnaartut amerlanerannut atuartitsinerit amerlanerpaartaat qallunaatut ingerlanneqartarnerannik pissuteqartoq, Ilaqutariinnermut, naligiissitaanermut isumaginninnermullu naalakkersuisoq, Martha Lund Olsen isumaqarpoq. KNR.gl-mut isummersorluni allappoq:
- Inunnik isumaginnittunngorniarfimmi ilinniartitsisuuuninni misilittakkakka naapertorlugit, nammineq oqaatsit atorlugit neqeroorfigineqarnissaq aammalu nammineq oqaatsit atorlugit suliaqarsinnaaneq pingaarluinnartuuvoq.
- Siullertut, inooqataanikkut ajornartorsiutit angisuut aammalu ilinniartut misigisarsimasaat tunngavigalugit, tamakkuninnga nammineq oqaatsitik atorlugit eqqartuisinnaanissaat pingaarluinnartuuvoq.
- Ilisimasat, ingerlatitseqqiineq misilittakkallu ataatsimoortillugit nammineq oqaatsit atorlugit oqaluuserinissaat, kiisalu aamma nammineq oqaatsit atorlugit suliakkiissutinik suliaqarnissamut periarfissaqarnissaq pingaarluinnartuuvoq. Aammattaaq imminut suliarisinnaanissamut periarfissinneqarnissaq, taamaaliornikkummi nammineq tunuliaqutarisat iluarsereeraanni allanik aatsaat ikiuisoqarsinnaavoq. Ilinnialernissamut piumasaqaatit sukaterneqarneri inunnik isumaginninnermi siunnersortinik amigaateqarnerujussuarmut aaqqiissuutaanavianngilaq, Martha Lund Olsen isummersorluni allappoq.
Aamma atuaruk Pitsaassutsimik qaffassaaniarneq inissaqartitsilluarnermut ajoqutaassaaq
Inissaqarluartitsinissamut ajoqutaasoq
Ilinniartut ilinniakkatigut pikkorinneroreersut kisiisa aallunneqarnerarlugit Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliami ilaasortat Vivian Motzfeldtip (S), Peter Olsenip (IA), Suka K. Frederiksenip (S), Poul Hansenip (D) aamma Mimi Karlsenip (IA) isornartorsiorpaat.
- Ilinniartitaanerit pitsaassusiannik qaffassaaniarnermi qaffasissutsinik aalajangersimasunik angusaqarniareersut mattunneqaannarnerat ataatsimiititaliamit ernumanartoqartinneqarpoq. Inissaqarluartitsinissaq sumiippa, ataatsimiititaliap siulittaasua, Vivian Motzfeldt, ataatsimiititaliaq sinnerlugu marsimi taama aperivoq.
Ilinniartitsisunngornialernissamut, peqqissaasunngornialernissamut, isumaginninnermi siunnersortinngornialernissamut kiisalu oqaasilerinermik, atuakkialerinermik tusagassiuutilerinermilu ilinnialernissamut piumasaqaatit sukaterneqartut aappaagu atuutilissapput.
