Ilinniakkaminnik naammassinnittartut amerlinissaat sukaterinikkut qulakkeerniarneqartoq
Rektor Tine Pars, Inatsisartut ilinniartitaanermut ataatsimiititaliaanut oqaaseqaammik allagaqarpoq, ilinniakkanut ingerlaqqiffiusunut piumasaqaatit sukateriffigineqarnerat ataatsimiititaliamit isornartorsiortoqareersorlu.
Ataatsimiititaliaq isumaqarpoq ilinniarnissamut piumasaqaatit sukateriffineqarnerisigut inuusuttut ilinnialernissaannut mattunneqartut. Ilinniartitaanermi periuseq inissaqartitsilluartoq ujartorneqarpoq, ataatsimiititaliap siulittaasua Vivian Motzfeldt qanittumi tusagassiuutinut nalunaaruteqarluni taama allappoq.
Ilisimatusarfimmi pitsaasumik ilinniakamik aallussiniaraanni ilinniarnertuunngorniarfimmi ilinniarluaqqaarnissamik piumasaqaatitaqarpoq, ilinniartut ilisimatusarfimmi ilinniakkaminnik naammassinninnissaannik periarfissiisumik, Ilisimatusarfiup rektoria Tine Pars Ilisimatusarfiup nittartagaani taama allappoq.
Ilisimatusarfiup ukiuni arlaqalersuni sulissutigisimavaa pitsaassutsip qaffassarnissaa, tamannalumi Ilisimatusarfiup pilersaarutaanit salliutinneqarpoq. Ilisimatusarfimmi ilinniartitaanerit ilaanut piumasaqaatit ukiuni kingullerni allanngortinneqarnikuuupput tamannalu pisimavoq maanaannaq atuarunnaartartorpassuit kingunerisaanik, Tine Pars nassuiaaavoq.
Aamma atuaruk Pitsaassutsimik qaffassaaniarneq inissaqartitsilluarnermut ajoqutaassaaq
Ilisimatusarfimmi ilinnialernissamut piumasaqaatit sukateriffigineqarneranut politikerit soqutiginninnerussuat pissuteqarpoq, ilinniarnertuutut ilinniagaq ukiumik ataatsimik sivisussuseqartoq GU pilotimik taasaq atorunnaartussanngormat.
GU pilotimik aaqqissuussineq unitsinneqarpoq tassannga ingerlatsisimasut ilinniakkaminnik artorsartarnerat pissutigalugu, ilisimatusarfimmi rektor nassuiaavoq.
Ilinniakkamik aallartinnissamik piumassuseqarluartoqarsinnaavoq, kisianni inuiaqatigiinnut namminerlu inuttut ataasiakkaatut uggornartarpoq, ilinniakkamik naammassinninnissamik piginnaasat pisinnaasallu amigaatigineqartillugit, Tine Pars oqarpoq.
- Taamaattumik ilinniartitaanerit piareersarfiusut pigineqartariaqarput, ilinniartuutitta ilinniakkanut ingerlaqqiffiusunut pitsaasumik angusaqarluarnissaannik periarfissiilluartunik, Ilisimatusarfimmi rektori Tine Pars ilisimartusarfiup nittartagaani taama allappoq.
