Martha Lund Olsen: Isumaginninnermik sulialinnit ilaqutariit pulaarneqartalissapput
Naalakkersuisoq kommuneqarfik sermersuumi meeqqat inuusuttullu ikiortariallit inissitassallu amerliartornerinut aningaasartuutillu millionerpassuarnik qaffariarneri pillugit taama qisuariaateqarpoq.
Taassuma ajornartorsiutip qanoq sulissutigineqarnissaa pillugu kommunini isumaginninnermut suliaqartut politikerillu isumasioqatigalugit ingerlattarpai.
Kommuneqarfik Sermersuumilu isumaginninermut ataatsimiitsitaliaq kingullermik naapeqatigigamigit eqqartueqatigeqqippai pilersaarusioqatigalugillu.
- Ullumikkut ilaqutariit ajornartorsiuteqartut, isumaginninnermut allaffeqarfinnut imaluunniit ilaqutariinnut sullissivinnut ornigullutik siunnersorneqartarput. Kisianni mumillugu imaalinissaat eqqartukkatta ilagivaat, sulisut angerlarsimaffinnut ornigullutik tapersersuilluitik. Taassumalu ineriartortinnissaa orniginartillutigu eqqartueqatigiinnitsinni killiffiginikuuarput, martsimilu qularnanngitsumik ataatsimiilerutta taakkua pulaffigisussaassavagut, Ilaqutariinnermut isumaginninnermullu Naalakkersuisoq Martha Lund Olsen oqarpoq.
Aamma atuaruk Sermersuumi inissitat pingajorarterutaat tasiilameersut
Marsimi Maniitsumi KANOKUKA-mit aaqqissuunneqartumi naapeqatigiinnissami kommunini isumaginninnermut ataatsimiitsitaliameersut isumaginninnermullu pisortat peqataatinneqassapput.
Siorna ukiakkut ataatsimiinnissamut Martha Lund Olsenip taanna siunnersuutigineqartunut ilanngukkaluarpaa qinersisoqarmalli iluatsinngimmat inatsisartuniillu tigulluarneqanngimmat, maanna unitsikkallarpaa maniitsumi ataatsimeeqatigereernerup kingorna nutarsaqqitamik siunnersuuteqarnissi siunertarilerlugu:
- Sullissinermi angummassinnaannginneq ajornartorsiutit annertuut ilagivaat, aamma aallaavigivaat. Taamaattumik inatsit nutartigassarput nalilersoqqittariaqartut eqqarsaatersuutigisimavara, taamaattumik kommunalbestyrelsep martsimi naapinnissaannut nalilersueqqissaagut, qanoruna ingerlariaqqissasugut? Taamatut allanngortiteriniarnerput naammagalugu ingerlateqqissavarput? imaluunniit pissutsit massakkorpiaq pissutaasut aallaavigalugit inatsit naapertuuttunngortissanerlugu? tamakkua nalilersortussaavagut, Martha Lund Olsen oqarpoq.
Naapeqatigiinnermi meeqqanut inuusuttunullu inatsisissap nutarterneqarnissaa nalilersorneqassaaq.
- Soorlu imaassinnaavoq isumaqatigiittugut inatsip allanngornissaanut pikkorissaanerit ima qaffasitsigilersimasariaqartut. Tassa tamakkuupput nalilersugassatta ilagisussaavaat, Ilaqutariinnermut, Naligiissitaanermut isumaginninnermullu Naalakkersuisoq Martha Lund Olsen taama oqarpoq.
