Politikki

Angerlarsimaffeqanngitsoq: Inisimasuulluni eqqarsarnartaqaaq

Angerlarsimaffeqanngitsut angerlarsimaffigigallarsinnaasaannik 100-nik sanaartoqarnissaanik Inuit Ataqatigiit siunnersuuteqarnerat, amerlanerussuteqartunit ilassilluarneqarluni ataatsimiititaliamut suliasanngortinneqarpoq.

Allattoq Sara K. Jakobsen, Inge S. Rasmussen

oktobarip 07-at 2016 15:56

Taamalu ittut ilisimatuup angerlarsimaffeqanngitsullu pisariaqarnerarpaat.

- Nammineq angerlarsimaffeqanngilanga. Taannartaa assoroornaqaaq, angerlarsimaffeqanngitsoq Karl Kristoffersen oqarpoq.

Nunatsinni angerlarsimaffeqanngitsut 600-t missaanniittut, Namminersorlutik Oqartussat nalunaarusiaanni atuarneqarsinnaavoq.

Angerlarsimaffigigallarsinnaasaannillu tuniinnarlugit ajornartorsiut ingerlaannaq aaqqinneqarnavianngitsoq, Angerlarsimaffeqanngitsut pillugit immikkut ilisimatusartoq isumaqarpoq.

Aamma atuaruk Angerlarsimaffeqanngitsut hunnorujulikkaat

- Taakkua inuiaqatigiinnut atugarissaarfiusunut ilanngunneqassappata immikkut pisariaqartitaannut naapertuuttumik iliuuseqaqqaartoqartariaqarpoq, Ilisimatusarfimmi ilisimatooq Steven Arnfjord oqarpoq.

Soorlu inuusuttunut, angutinut imigassamik atornerluisunut, arnanut immikkut pisariaqartitalinnut angutinullu utoqqarnut agguataarneqarsinnaasut ilisimatooq oqarpoq. Taakkualu pisariaqartitaat assigiinngitsuupput.

Anaanaq angerlarsimaffeqanngitsoq assersuutissaavoq:

Meeraqarluni tulluanngiivippoq, inersimasunut meeralinnik angerlarsimaffeqanngitsunut tamanna tulluarsorinngilara, Else Thorsen, angerlarsimaffiugallartunik pilersitsinissamik IA-p siunnersuutaa pillugu oqarpoq.

Aamma atuaruk Ilisimatooq: Angerlarsimaffeqanngitsut assigiinngitsuupput

Karl Kristoffersenimulli angerlarfissaqarluni iluassaqaaq.

- Inisimaffimmut angerlaleraanni eqqarsarnartarnermut, soorlu assersuutigalugu aalakoorpat? Suppat? Isumaluppat? Tamakkuninnga eqqarsarunnaarluni iluassagaluarpoq.

Aammali angerlarsimaffiugallartumi oqaloqateqarsinnaanissaq periarfissaasariaqartoq taanna nangippoq:

- Ilannguagut qimaguttarput sunaaffa qamuuna assoruuteqarsimallutik, inuunertillu allatut ajornartumik qimallugu peeruttarput. Tamakkua pinaveersaartinneqarnissaat kissaatiginaraluaqaaq, Karl Kristoffersen oqarpoq.

Inissalli 100-t naammanngillat.

- 100-nnaat sananiarpaat? Naammanngilluinnarput, angerlarsimaffeqanngitsoq, Lars Mikael Egede, oqarpoq