Angerlarsimaffeqanngitsut hunnorujulikkaat
Nalunaaarusiaq innuttaasunut akiitsoqarnikkut ajornartorsiutilinnut siunnersuisarfimmik pilersitsisoqarsinnaaneranik misissueqqissaarnermik Naalakkersuisut suliaqarnerannut ilaavoq.
Angerlarsimaffeqanngitsut 600-t missaanniittut kisitsisit takutippaat.
Paasissutissanilli tigussaasunik pissarsinissaq ajornakusooqimmat, kisitsisit saqqummiunneqartut missingersuutaannaasut, nalunaarusiami eqqumaffigeqquneqarpoq.
Angerlarsimaffeqanngitsummik ilaquttaminni ikinngutiminniluunniit inisimasartut inunnik nalunaarsuisarfinnut nalunaarneq ajormata, inisimaffimmik ineqarnermut tapiissutisianut taamaalioruni sunniuteqarsinnaammat.
Angerlarsimaffissaaleqineq Inatsisartuni ullumi ullormut oqaluuserisassani ilaavoq.
Namminersorlutik Oqartussat kommunit suleqatigalugit angerlarsimaffeqanngitsunut angerlarsimaffiugallartussanik 100-nik sanaartornissaat qulakkeerniarlugu aningaasaleeriaatsimik imaqartumik Naalakkersuisut saqqummiussinissaat Inuit Ataqatigiinnit siunnersuutigineqarpoq.
Siunnersuulli Naalakkersuisunit taperserneqanngilaq. Nunatsinni innuttaasunik sanngiinnerusunik isumaginninnissaq kommunit pisussaaffigigaat, ilaatigut tunngavilersuutigineqarpoq, taavalu angerlarsimaffeqanngitsunut immikkut inissialiornissaq ineqarnermut inatsimmi ilaanani.
