Qulaarpaa Mamakujuttut Teresap toqqissisimanarisimavai
Teresa Simonsen 27-inik ukiulik inuunini tamaat oqimaattuusimavoq. Taanna Type 2-mut sukkulernissamut nappaateqalernissaminut qanittuaraasimavoq.
Meeraallunili tungusunnitsunik nerillattaasarsimavoq. Aanaatalu asanninnini mamakujunnik tunisinikkut takutittarsimallugu.
- Kalaallit akornanni qanga ilioriaasiusimavoq soorlu asasaq nuannaartinniarlugu perusutaanik tunisarnera.
Tassa mamakujuttunik meeqqat tunineqartarneri asanninnertik tassuunakkut takutinniarlugu naak peqqinnanngikkaluartoq.
- Mamakujuttunik peqqinnanngitsunik nuannaartinniarlugu tunisarsimallugu, Simonsen oqarpoq.
Peqqissuunermut ajoquseerujussuarsinnaavoq
Nunat immikoortortaani nakorsat ittuata Henning Sloth Pedersenip taakkartorpaa mamakujuttorpallaarujussuartugut, meeqqallu ataasiakkaat aamma annertuumik mamakujuttortartut.
- Tamatigut mamakujuit poortat ataatsit tunniunneqartariaqanngillat, nakorsaq oqarpoq.
Henning Sloth Pedersen
Ileqqut pigiliussat nakorsap tikkuarpai takkuummata meeqqat sukkulernissaannut tunngaviliisut, peqqinnissaqarfimmut inuillu peqqissuunerannut ajoquseerujussuarsinnaasut.
- Ilimangilluinnarpara mamakujuttut imigassamit tupaminngaanniillu ulorianarnerusut tassami inuiaqatigiit tamangajammik meeraanerminiilli eqqorneqartarput.
Aamma atuaruk Genip immikkuullarissup kalaallit sukkulersittarpai
Aamma atuaruk Eqiasuppallaarpugut, pualavallaarlutalu
Siunissami agguaqatigiisillugu inuunertussusissaq aallaavigalugu inuit amerlanerit sukkulersinnaassapput naak kisitsisit ullumi annertoreeraluaqisut Marit Eika Jørgensen Syddansk Universitetimi Issittumi peqqinnermi professori oqarpoq.
- Innuttaasut amerliartortut maanna 10 procentingajai Type 2-mik sukkorput, ukiut ingerlanerini allanngortoqangaatsiarsimavoq sukkoqalernissamullu aarlerineq annertusingaatsiasimalluni.
Ajortoq naaffeqanngitsoq
Oqimaappallaarneq Teresa Simonsenimut akornutaalersimavoq.
Timikkut qinngasaarneqartarnerullu nassataanik ikeqalernikkut allaanerusutullu misiginikkut.
Meeqqat pualavallaartut
Kalaallit meerartaat oqimaalliartuinnartut, oqimaallivallaartarnerlu siusilligaluttuinnartoq misissuinerit takutippaat.
Paasissutissat: Kalaallit Nunaanni innuttaasut peqqissusaat 2014
Tamanna ajortutut naaffeqanngitsutut pilersimavoq timersortarunnaarsimavormi misigisimagami qinngasaartissalluni.
- Imminut tatiginera naleqartinneralu annikitsuaraasimavoq.
Timersorneq unitsikkamiuk nerinermut qimaasaleqqissimavoq.
- Nuannaannginnermi imminut tuppallersarluni nerineq. Tassa nuannaannginnermi nerineq toqqissisimanarisimavara.Teresa Simonsen oqarpoq.
Peqqinnerulerneq nuannaarulernerlu
Teresa Simonsen ullumikkut allatut iliulersimavoq, perlilernissanimi sungiusarpaa timigissartarfimmiittalersimallunilu, ullaakkut uuttoraangat uuttuup nuannersunik eqqarsaatinik tunisarpaa.
Maanna Teresa Simonsen oqiliartorpoq.
- Ammanerusumik eqqarsartariaaseqalersimavunga, qiimanerulersimavunga piumassuseqarnerulersimallungalu.
