Malmøp innaallagiaaruttoorneranut qullartaasiaq pissutaasoq
Malmø ukiortaami unnuap-qeqqata qaangilaaraa innaallagiaaruppoq. Sverigemiut tuusintilippassuit nuannatileruttortut illoqarfissuaq innaallagiaaruppoq inuppassuillu aamma elevatorini nikinnaveerlutik.
Tamatumunngalu suna pissutaasimanersoq innaallagissamik pilersuisup Eon Elnättip paasisimagaa, aviisip Sydsvenskanip allaaseraa.
Thailandimiut naneruarfiusaataat qullartittagaq - khom loy - Sverigemi innaallagissiorfiit anginersaannut nakkarsimavoq.
- Tassunga nakkarnera pisinnaasut ajornersaraat, Eon Elnättimi attaveqaqatigiinnermut pisortaq Johan Aspegren aviisimut taama oqarpoq.
Januaarip aallaqqaataani nalunaaqutaq 01.13 illoqarfiup ilarujussuani inuit suli nuannattut innaallagiaaruppoq.
SOS Alarmimi pigaartuusut innuttaasunit elevatorini nikinnaveeqqasunit sianerfigineqarsimapput.
Ukiortaap unnuaa annaassiniartartunut ulapaarfiusarpoq, taamaammat elevatoriniittut tamaasa orninneqarsinnaasimanngillat, Sydsvenskan taama allaaserisaqarpoq.
Naneruarfiusaaq qullartittagaq innaallagissiorfimmi innaallagissap aqqutaasa katersorsimaffigisaannut nakkarsimavoq, taamaalisoqarneranilu Malmøp ilarujussua innaallagiaaruppoq.
Innaallagiaaruttoornermit nalunaaquttap akunnerata affaa qaangiummat innaallagissiorfimmi sulisut ajornartorsiutaasoq iluarsisinnaasimavaat.
Naneruarfiusaat qullartittakkat khom loyit Thailandip avataani aamma nuannarineqarluartuupput minutsinilu arlalissuarni qullariartortarlutik.
Nunat ilaanni inerteqqutaapput, Sverigemili akuersissummik piniaqqaanngikkaluarluni naneruarfiusaat amerlanerpaamik 50-it aallartinneqarsinnaallutik, Sydsvenskan taama allaaserisaqarpoq.
/ritzau/
