Macron aamma Le Pen ingerlaqqittut

Qinersinerup immikkoortuani siullermi sapaammi ingerlanneqartumi inernerit, Frankrigimi nunami namminermi pissutsinut ministereqarfimmit ataasinngornermi ullaakkut avammut saqqummiunneqarnerisa kingorna tamanna erserpoq.

Partiimit qiterlermeersoq Emmanuel Macron 23,75 procentinit taaguunneqarpoq talerperliuniartullu siuttuat Marine Le Pen 21,5 procentinit taaguunneqarluni.

Konservativineersoq François Fillon taaguunneqarnerpaat pingajoraat 19,91 procentinit taaguunneqarluni, sisamaattullu inissisimavoq saamerlerneersoq Jean-Luc Mélenchon 19,64 procentinit taaguunneqartoq.

Qinersinerup immikkoortuani siullermi inernerit imminnut qanittuararsuugaluartut, qinersinerup immikkoortuata aappaa aamma pissanganarluinnartuussangatinneqarpoq.

- Emmanuel Macronip qinersinermi ajugaanissaa qularutiginngilluinnarpara, Tuluit, Germanerit Romanerillu pillugit Københavnip Universitetiata misissuisoqarfiani pisortaq Jørn Boisen taama oqarpoq.

- Qinersisartunik isumasiuinerit naapertorlugit, qinersinerup immikkoortuata aappaani Macron 60 procentinit Marine Le Penilu 40 procentinit taaguunneqassapput. Nikingassutaat angisuupilussuuvoq, taamaammat ilimaginngisamik pisoqariataassanngippat Macronip ajugaanissaa ilimanarluinnarpoq.

Qinersisartunik isumasiuinerit tatiginarpallaannginnerat Jørn Boisenip isumaqatigaa - pingaartumik Tuluit Nunaata EU-mit aninissaata taasissutigineqarnerata USA-milu præsidentimut qinersisoqarnerata kingorna. Frankrigimili qinersisartunik isumasiuinerit tatigilluarneqarsinnaasut erseqqissaatigaa.

/ritzau/Reuters