GE: Kinamiunik mattussiniarneq piisaarnertut isigisariaqarpoq

Aalisarneq pillugu Sulisitsisut Peqatigiiffiata ataani ataatsimiititaliami siulittaasoq, Henrik Leth, Naalakkersuisut akissutaannut taama oqaaseqarpoq.

Kinap Naalagaaffiit Peqatigiit ataanni aalisarnikkut suliniaqatigiiffimmi NEAFC-mi ilaasortaannginnera pissutaalluni unioqqutitsisumik, nalunaarsugaanngitsumillu killilersugaanngitsumillu aalisarsinnaangoratarsinnaammat Kinamiut Nunatta imartaani aalisarsinnaanissamut mattunneqartut Naalakkersuisut oqaatigaat, Kina Nunatta imartaani aalisarsinnaassappat, Kalaallit Nunaata pisassat pillugit isumaqatiginninniarnerni ajornerusumik siunissami inissisimalersinnaanera Naalakkersuisut aarleqqutigigaat naalakkersuisut oqaatigaat.

Naalakkersuisulli oqaasii Henrik Lethip naammaginartinngilai:

- Piisaarnertut suli isigaara. Akissaqartutulli misigisimagaanni akueriinnartariaqassavara, Henrik Leth, Aalisarneq pillugu Sulisitsisut Peqatigiiffianni ataatsimiititaliami siulittaasoq oqarpoq.

Naak ukioq manna avaleraasartoorniarneq siornamut naleqqiullugu ingerlalluarnerugaluartoq, pisassiissutigineqartut 85.000 tonsit pingajorarterutaasa pisarineqannginnissaat naatsorsuutigineqarpoq, pisassiissutigineqartullu tamakkerneqassappata Kinamiut taamaammat aalisarsinnaatitaasariaqaraluartut Henrik Lethip oqaatigaa, pisassiissutigineqartummi tamakkerneqanngippata Kalaallit Nunaannut iluaqutaanavinngimmat:

- Siunissaq qaninnerusoq eqqarsaatigissagaanni taava pisassiissutigineqartut tamakkerneqarnavianngitsut isumaqarpunga, Kalaallit Nunaata periarfissaanik innarliissalluni, Kalaallit Nunaatalu aningaasarsiornikinnerulerneranik kinguneqassasoq. Siunissarlu ungasinnerusoq eqqarsaatigissagaanni aalisartoqarpallaassanngitsoq, taamalu pisassiissutit amerlineqarsinnaannginnerinik kinguneqarsinnaasoq. Kisianni tassa aalajangiisoqareerpoq, aalajangiinerlu ataqqineqartariaqarpoq. Politikkikkut aalajangiineruvoq tusaatissatullu tiguinnartariaqassavarput, Henrik Leth oqarpoq.