Camp Century Lidegaardip isumaqatigiissutigineqarsimasut ilisimannginnerarpai
- Allakkami allassimasut 100 procentimik akisussaaffigaakka.
Martin Lidegaard 2014-imi nunanut allanut tunngasunut ministeriunermini naalakkersuisuni siulittaasuusimasumut Aleqa Hammondimut allagarsimasani pillugit KNR-imut taama oqarpoq.
Taassuma USA-p Camp Centurymi atomimik mingutsitsisumik atomimik innaallagissiuutiliornissaannik Sermersuarmullu imikoorummik qinngornernik ulorianartortalimmik annikitsumik kuutsitsisinnaanissaanik Danmarkip 1960-imi akuersissuteqarsimanera sapaatip akunnerata siuliaatinnagu ilisimasimannginnerarpaa.
- Sapaatip akunnerata siuliani oqaatigisattulli, Kalaallit Nunaat pisinnaanermik apereqqaartinnagu Danmarkip USA-llu akornanni isumaqatigiissuteqartoqarsimanera ilisimanngilara.
Innersuussineq ersarinngitsoq
Aleqa Hammondip 2014-imi allagaq pillugu Camp Centurymulluunnit tunngasumik allamik oqaaseqartinniarnera iluatsissimanngilaq. Vittus Qujaukitsumulli innersuussiinnarpoq.
Allakkami imikoorummut qinngornernik ulorianartortalimmut tunngasumi ”amerikamiut danskillu isumaqatigiissutaannik” aamma imaqartoq, Martin Lidegaardip nassuerutigaa.
Danmarkilli USA-mut 1960-imi akuersissuteqarneranut tunnganersoq erseqqissumik takussutissiinngilaq.
- Arlaatigut isumaqatigiissusiortoqarsimassasoq atuarneqarsinnaavoq. Sunali isumaqatigiissutaasimanersoq, Kalaallit Nunaat ilisimatinneqarsimanersoq ilisimatinneqarsimannginnersorluunniit sunarpiarlu isumaqatigiissutigineqarsimanersoq ersinngilaq. Aleqamut akissuteqarninni naamik. Aamma ilanngutanik arlaannut kakkiunneqarsimanerso takusinnaanngilara.
1965-imi nalunaarusiaq allakkamiluunniit innersuussutigineqartoq Dansk Udenrigspolitisk Institutimiit 1997-imi nalunaarusiaq, allakkami innersuussutigineqartoq, atuarsimanagu, Lidegaardip oqaatigaa. Aamma allagaq nunanut allanut ministereqarfimmiit Kalaallit Nunaat pillugu ataatsimiititaliamut oktobar 2016-imi nassiuteqqinneqarmat atuarsimanngilaa.
- Takorloorluarsinnaavara allagaatit hunnorujukkaanik qupperneqartut tamarluinnaasa atuarsimassanngikkikka. Paasissutissanillu arlaannik taakkuani toqqorsimasoqarsinnaavoq. Takusaqarsimaninniilli eqqaamasaqanngilanga, Martin Lidegaard oqarpoq.
Erseqqinnerusumik oqaaseqarusussagaluartoq
Danmarkip USA-llu 1960-imi atomimik Camp Centurymi innaallagissiuutiliornissamik ulorianartunillu qinngornertalimmik imikoorsinnaanermik isumaqatigiissuteqarsimasut tamanit ilisimaneqartuugaluarpat, Aleqa Hammondimut allakkat allaanerusumik nipeqarsimasagaluartut, Lidegaard oqarpoq.
- Taamaattoqarnera Ilisimasimasuugukku tamanillu ilisimaneqartuuppata allakkakka allanik oqasertalersorsimassagaluarpakka.
