Lidegaard qinersinissaq pillugu: Ukiunut amerlasuunut anguniagaqaritsi
Kalaallit Nunaat siumut aallariassappat pisariaqartinneqarpoq politikkikkut eqqissisimasoqarnissaa isumaqatigiittoqarnissaalu - ingammik nunanit allanit aningaasaliisoqartillugu.
Kalaallit Nunaata ukiunut tulliuttunut sisamanut, tallimanut arfineq pingasunut suna anguniassallugu neriuutigaa? Qanoq iliorluni Kalaallit Nunaata aningaasaqarniarnera ilorraa tungaanut aallartinneqarsinnaava? Qanoq iliorluni Kalaallit Nunaata partiit tamarmik kissaataat naapertorlugu aningaasaqarniarnini patajaannerulersissinnaavaa?
Nunanut allanut tunngasunut ministerip Martin Lidegaardip apeqqutit tamakku ersarissumik inatsisartunut qineqqusaarnermi akineqarnissaat neriuutigai.
Sivisuumik politikkikkut eqqissisimasoqartariaqarpoq
Naallu ministerip Kalaallit Nunaata Danmarkillu nunanut allanut tunngasutigut suleqatigiinnerat ajunnginneraraluarlugu Kalaallit Nunaat siumut aallassappat pisariaqarnerarpaa sivisuumik politikkikkut eqqissisimasoqarnissaa.
Aamma atuaruk Lars-Emil: Naalakkersuisut siulersorneqarsimanngillat
- Avataaniit aningaasaliisoqassappat politikkip tungaatigut patajaattumik ingerlasoqarnissaa pisariaqarluinnarpoq. Aningaasaliisussammi tamarmik soorunami nuna qiviarunikku oqartarput: Uh aamma taakkuussappat, ima akileraaruseriaasillit, aningaasaleeriaasillit, taama piumasaqaatillit aamma ukiut marluk sisamat qaangiuppata.
DF: Siumut IA-lu Naalakkersuisooqatigiilerlik
Danmarkimi illuatungiliuttut Dansk Folkepartiit neriuutigaat toqqissisimasumik ingerlasoqassappat Inuit Ataqatigiit aamma Siumut qinersereernerup kingorna suleqatigiittariaqartut:
- Nunani allamiut Kalaallit Nunaanni aningaasaliisussaangaluit ukiuni kingullerni misigisimasaat amiilaarnarsimavoq. Taamaattumik naalakkersuisooqatigiinnissap piviusunngornissaa pingaaruteqartupilupilussuusoq, Søren Espersen Dansk Folkepartiimeersoq oqarpoq.
Aamma atuaruk Nunanut allanut tunngasunut ministerip isornartorsiuineq ilumuunnginnerarpaa
Taamali ersaritsigisumik Martin Lidegaard oqanngilaq.
- IA Siumullu akornanni suleqatigiittariaqanngilaq. Danmarkimi arlaleriarluta iluatsittumik misilittarparput partiit qiterpasissumiittut suleqatigiinnerat. Qinersineqareerpat kikkut ajugaanersut apeqqutaatinnagu taamatut suleqatigiittoqarnissaa neriuutigaara, Martin Lidegaard naggasiivoq.
