Lego maana nunarsuarmi nioqqutissiani naleqarnerpaat 82-erilerpaat
Ussassaarutileriffiup Interbrandip ukiut tamaasa nioqqutissiat naleqarnerpaat naatsorsuiffigisarpai, maannalu taakku naapertorlugit Lego nunarsuarmi nioqqutissianik naleqarnerpaat 82-erilerpaat. Maannakkummi Lego fem milliarder dollaritut naleqartigilersimavoq, danskit koruuninngorlugit 36 milliarder koruunit.
- Nunarsuarmi nioqqutissiani naleqarnerpaani normu 82-ngorneq assorsuaq kusanarpoq, Børsenimi aaqqissuisoq Niels Lunde taama oqarpoq.
Qaqutigoortuuvoq danskit tunisassiorfiisa allattorsimaffimmut tassunga ilanngunneqartarnerat, taamaattorli Legop tassunga inissinnera Niels Lundep tupaallaatiginngilaa.
- Legop ukiuni kingullerni tallimani naleqassutsimigut qaffariartinneqarsimanera nalissaqanngitsuuvoq.
Aamma atuaruk Greenpeacep legonik issittuliani mingutsitsivigigaa
Aningaasarsiornissaq Legop assut pikkoriffigisimangaa Niels Lunde oqarpoq, taamaattuminguna allattorsimaffimmut tassunga inissittoq. Aammali Lego ajunngitsutut ilisimaneqarami tassunga inissittoq, taanna oqarpoq.
- Ileqqorissaarniartuarsimapput, eqqaamaneqassajunnarsivoq siorna Greenpeacemiit saassunneqarmata Issittumi Shellimik suleqateqartutut. Taava Legop Shell suleqatigiunnaapallappaa, taama ersersinneqarpoq nioqqutissiaatit naleqartilluarusukkaanni ilisimaneqarluarnissap pingaartinneqarnera.
Nioqqutissiat pitsaasut pigigaanni imaanngilaq aamma taamaallaat iluanaarniallaqqissuuneq naammattoq. Aamma sulisunik pikkorissunik nunarsuarmi tamarmeersunik kajumitsitsilernissaq ajornannginnerulersartoq Niels Lunde oqaluttuarpoq:
- Suliffeqarfiit unammillertut ullutsinni pikkoriffigisaanni pingaarnerpaanut ilaavoq allanut naleqqiulluni sulisunik pikkorissunik kajumissitsisinnaaneq, Niels Lunde oqarpoq.
Apple ingerlaannartumik ukiut pingajussaat nioqqutissiortuni naleqarnerpaajuvoq, 170 milliarder dollarsinik naleqarami. Google aappaattut inissittoq Coca Cola pingjuattut inissippoq.
