Korea Kujalliup sorsuttoqarnissaa aarleriginngikkaa
- Sorsuttoqalernaviannngitsoq qularutiginagu oqaatigisinnaavara, Moon Jae-in, Korea Kujallermi præsidentitut atuuffimmini ullut siulliit 100-t pillugit tusagassiortunik katersuutsitsinermini taama ilaatigut oqarpoq.
Korea Avannarliup USA-llu akornanni oqaatsitigut sakkortuumik qunusaarinerit piffissami kingullermi atorneqartareersut taama nalunaaruteqartoqarpoq.
Qunusaarisoqarnerata kingorna aallartitaqarnikkut aaqqiissutissamik nassaartoqarnissap pingaaruteqassusia Naalagaaffit Peqatigiit qullersaata ippassaq eqqaasitsissutigaa.
- Najummatsisimasoqartillugu paatsooqatigiinnissamut qaninnerusarpoq,
Aallartitaqarnikkullu aaqqiissuteqarnissaq Korea kujallermi præsidentip Moonip neriorsuutigaa.
- Korea avannarleq ajortsisaaraluni peqqusaarunnaarpat oqaloqatigiissinnaanerput upperaarput.
Oqaloqatigiittoqarsinaalerpat, sinniisuutitanik Korea Avannarlermukartitsinissaq eqqarsaatigissavarput, Moon oqarpoq.
Korea Avannarliup qanittumi qunusaarutigaa, amerikamiut qeqertaat manerassuarmiittoq Guam saassunniarlugu.
Korea avannarliup præsidentiata Kim Jong-unip marlunngornermi nalunaarutigaa, USA-p qanoqiliornissaa utaqqineqartoq.
- Pitsaasumik oqaloqatigiittoqarnissamut suli soqutiginnippugut Korea Avannarliulli præsidentiata qanoq iliornissaa apeqqutaavoq, USA-mi nunanut allanut tunngasunut ministeri Rex Tillerson oqarpoq