Kommunit pillugit ilisimatooq: Oqaloqatigiinnissaq ajornarnerulissaaq
KANUKOKA-p allaffeqarfissua Nuummiittoq, Namminersorlutik Oqartussallu allaffeqarfissuannut 50 meterit missaannik qanitsigisoq, illoqarfimmut allamut nuunneqassasoq, marlunngormat aalajangerneqarpoq.
Aamma atuaruk KANUKOKA-p allaffeqarfia Nuummiikkunnaassaaq
Tamannalu kattuffimmut ajoqutaasinnaasoq, kommunit pillugit ilisimatooq, Roger Buch isumaqarpoq.
- Ajornartorsiuuteqaraanni anigoruminaattumik aaqqiivigisariaqartumilluunniit, imminnut kiinarsilluni oqaloqatigiinnissaq pitsaanerusinnaasarpoq. Taamaaliornissarlu maanna ajornarnerulissaaq, Roger Buch oqarpoq.
Tamanna akimmiffiusinnaasoq KANUKOKA-mi siulittaasup Palle Jerimiassenip oqaatigigaluarlugu ajornartorsiuterujussuartut isiginngilaa.
- Nuummiuugaluarpat imaluunniit sinerissamiuugaluarpat imminnut isigaluni naapissinnaaneq ajornanngilaq. Aamma taanna pisariaqarpat, ullormiit ullormut pisinnaavoq. Taassuma saniatigut teknologii ima pitsaatigivoq, imminnut isigaluni teknologii aqqutigalugu oqaluussinnaalernerit aamma periarfissaalernikuupput, Palle Jerimiassen taama oqarpoq.
Aamma atuaruk KANUKOKA allatut ilusilerneqassaaq
Pissusissamisoortoq
KANUKOKA ataatsimiisitaliamik suligasuartussamik aamma pilersitsivoq, kattuffiup pisortaanik kommunillu suli ilaasortaasut pingasut pisortaannik ilaasortaaffigineqartumik, taannalu KANUKOKA-p allaffiata sumiinnissaanut innersuussisussaavoq.
Kattuffiullu allaffiata kommunimut ilaasortaasumut nuunneqarnissaa pissusissamisoortoq, Roger Buch isumaqarpoq.
- Kattuffiup qullersaqarfiata kommunimi ilaasortaajunnaartumiitiinnarnissaanut kommunit pingasut kiserngoruttut aningaasaajarusussanngitsut paasinartorujussuuvoq, Roger Buch Oqarpoq.
Aamma atuaruk Palle Jerimiassen: Asii Chemnitz Narup paasinerluisimavoq
Ajornartorsiutaanerpaaq
Taamaattoq KANUKOKA-p allaffeqarfissuata nuunneqarnissaa ajornartorsiutaanerpaajunngitsoq, ilisimatooq isumaqarpoq.
- Danmarkimi kommunini 98-iusuni, kommuni ataaseq kommunit kattuffiannit, Kommunernes Landsforeningimit, ilaasortaajunnaassagaluarpat kattuffimmut sunniuteqarnerluppallaarnavianngilaq. Aamma København, Danmarkimi innuttaasut qulerarterutaanik inuttalik, ilaasortaajunnaassagaluarpat kattuffik suli sunniuteqartorujussuussaaq. Kalaallit Nunaannili kommunit sisamaasuni ataaseq ilaasortaajunnaarpoq, tamannalu KANUKOKA-mut nukillaangalersitsinerussaaq, Roger Buch oqarpoq.
Aamma atuaruk Kanukoka naleqqussarneqartussanngortoq
Siulittaasoq oqaaseqartussaq
KANUKOKA-p allaffia sumi inissinneqassanersoq pillugu borgmesterit oqaaseqartinniaraluarpavut.
Kommune Kujallermi borgmesteri ilisimatitsivoq, kattuffiup nuutsinneqarnissaa pillugu KANUKOKA-mi siulittaasoq, Palle Jerimiassen oqaaseqartuusassasoq isumaqatigiissutigisimagitsik.
Qeqqata Kommuniani borgmesteri, Hermann Berthelsen aamma taama nalunaarpoq, ilanngulluguli oqarluni, KANUKOKA-p allaffia ilaasortaasut arlaata illoqarfianut nuutsinneqassasoq.