Kommunit aqunneqarnerat pillugu inatsimmut assigiinngitsunik isumaqartut

Nunaqarfinni aqutsisut kommunit aqunneqarnerat pillugu inatsisissatut siunnersuummi pissaaneqarnerulersinniarneqarput. Tamannalu pillugu assigiinngitsunik isumaqartoqarpoq.

Nunaqarfiit aqutsisuisa qanoq pissaaneqartiginissaat kommuninit aalajangerneqassasoq, kommunit kattuffiannit isumaqarput. Nunaqarfiilli peqatigiiffiannit nuannaarput.

- Nunaqarfinni aqutsisuni sulinissaq kajuminnarnerulertussaassaaq, Kalaallit Nunaanni Nunaqarfiit Peqatigiiffiata, KANUNUPE-p, siulittaasua, Jens Kristian Therkelsen oqarpoq.

Nunaqarfinni aqutsisut qanoq pisinnaatitaaffeqartiginissaat kommunalbestyrelsit ullumi aalajangertarpaat.

- Taannalu assigiinngitsunik atortinneqartartoq nunaqarfinnut aqutsisut peqatigiiffianninngaanniit maluginikuuarput. Taannalu assigiissaarneqarnissaanut tunngatillugu assigiinngitsunik oqaloqateqartarnitsigut kissaatigut apuuttarsimavagut. Taannalu immaqa piviusunngulinnguatsiarmat nuannaarutigisorujussuunikuuarput, Jens Kristian Therkelsen oqarpoq.

AAMMA ATUARUK Kommunit aqunneqarnerat pillugu inatsisissap qanimut oqartussaaqataanermik qulakkeerissasoq

Kommunit namminneq aalajangissagaat

Kommunilli kattuffiannit, KANUKOKA-mit taama nuannaartiginngillat.

Kommunalbestyrelsit nunaqarfinnilu aqutsisut maanna suleqatigiilluartut KANUKOKA-mit isumaqarput.

- Kommunit ilaannit ajunngilluinnaqqissaartumik suleqatigiinnikkut ingerlanneqartumik aqunneqarlutillu ingerlanneqarput kommunalbestyrelsininngaanniit nunaqarfinnut aqutsisunut aningaasaliissutit aammalu pisinnaatitaaffinnik agguaanerit, KANUKOKA-p siulittaasua, Simon Simonsen oqarpoq.

Tamannalu pissutigalugu kommunalbestyrelsit inatsisitigut pisussaaffilerneqartariaqanngitsut, taanna isumaqarpoq.

- Maannakkut aqutsinermut malittarisassani periarfissaatinneqareerput. Kommunit ataasiakkaarlutik namminneerlutik aalajangersinnaatitaavaat, Simon Simonsen oqarpoq.

Amerlanernut iluaqutaanissaa neriuutigineqartoq

Nunaqarfinni aqutsisut ilaasa suliassaqarfiit ilaanni aalajangiisinnaassuseqareernerat KANUNUPE-mit nuannaarutigaat.

Tamatumalu nunaqarfiit aqutsisuinut tamanut atuutilernissaa Jens Kristian Therkelsenip neriuutigaa.

- Nunarput tamakkerlugu assigiinnerulernissaa inatsisip uuma akuerineqassaguni qulakkeertussaammagu, taanna pissanganarpoq, aamma akuerineqarnissaa kissaatiginarpoq, KANUNUPE-p siulittaasua, Jens Kristian Therkelsen oqarpoq.

Kommunit aqunneqarnerat pillugu inatsisissatut siunnersuut oktobarip ulluisa 19-ianni Inatsisartunit aappassaaneerneqassaaq.

AAMMA ATUARUK Inatsisip nutaap kommunit unammisilissavai

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!