Kommunit allat aamma pujortarunnaarfiusinnaasut

Kommune Kujallermi sulinerup nalaani ukiortaareerpat pujortaqqusaajunnaartoqarnissaa Qeqqata Kommuniani ajunngilluinnartutut nalilerneqarpoq.

- Soorunami ukua inuunerinnerulernissamik aalajangernerat aamma suliffeqarfinni maligassiuinissamik oqariartuuteqarnerat aalajangernertut kusanartutut isiginarput, Qeqqata Kommuniani ilinniartitaanermut, peqqinnermut, sunngiffimmi sammisanut kultureqarnermullu ataatsimiititaliami siulittaasoq Evelyn Frederiksen taama oqarpoq.

Qeqqata Kommuniani upernaaq kommunalbestyrelsenngortut peqqinnerulernissamik siunniussaqarput.

Kommunelli ataani sulisut pujortarunnaarnissaannik suli eqqartuisoqanngilaq.

- Tassa qaqinneqarnikuunngilaq, uani massakkut suli eqqartorneqarnikuunngitsoq oqaaseqarfigisinnaanngilara siunissami qanoq ittoqarumaarneranik. Soorunami siunnersuuteqartoqariarpat tassani aalajangiiffigineqartussaassaaq, Evelyn Frederiksen oqarpoq.

AAMMA ATUARUK Kujallermi kommunip suliffeqarfiutaani pujortaqqusaajunnaassasut

Kommunenngortussaq iliuuseqarniarpoq

Kujataamiut pujortarunnaarsitsiniarnerat Kommune Qeqertalinngortussami aamma maligassiuinertut isigineqarpoq.

Innuttaasummi kommunimi sulisut pujortakulanerat maluginiarsimavaat, borgmesterinngortussallumi tamanna aamma maluginiarsimallugu.

- Ikaarsaariarnermut ataatsimiititaliami siulittaasunngorama saaffiginnittut innuttaasut siulliit ilaasa saaffiginnissutigaat kommunip allaffiani sulisut pujortarpallaaqaanngooq. Aamma maluginiarsimavara uanga taanna silataani pujortartarfik atorneqangaatsiartoq piffissami annertungaatsiartumi, Kommune Qeqertalinngortussami borgemsterinngortussaq Ane Hansen taama oqarpoq .

Taamaattumillu Kommune Qeqertalinngortussami kommunep ataani sulisut sulitillutik pujortartarunnaanissaat anguniarlugu eqqartuisoqarniarpoq.

- Sulisut tulliani paasissutisseqqilerukkit eqqarsaat taanna qaqinniarpara aamma sungiusalereerneqarsinnaammat maani kommunimi sulinerup nalaani pujortarnerup annikillisarneqarnissaa eqqarsaatigalugu, Ane Hansen taama oqarpoq.

Avannaata Kommunissaani kommunemi sulisut sulinermi nalaani pujortartannginnissaat eqqartorneqarsimanngitsoq borgmesterinngortussap Palle Jerimiassenip nalunaarutigaa.