Kommunalvalg 2017 Kommuninut qinersinermi arnat ilaat taaguunneqartorujussuit.
Kiista P. Isaksen 456-nit qinerneqartoq arnani qinerneqarluartut ilaagaat.
- Tanngassimaarnaqaaq qujanaqaaq, aamma nuannaarutigeqaara arnaqaterpassuakka tamaasa pilluaqqorusuppakka,
Kommune Kujallermi borgermesterissaq Kiista P. Isaksen taama oqarpoq.
Arnat qinerneqarluarnerulersimapput
Kommunini tallimani marlunngormat qinersisoqarmat arnat 27-t iserput.
Katillugit 81-t kommunalbestyrelsenut ilaasortanngorput, taamaalillunilu kommunini politikerit pingajorarterutaat arnaasussanngorput.
Arnat 2013-imut qinersinermut naleqqiullugu amelanerulilaaginnaraluartut, qinerneqarnerpaani qulini arnat amerlanerupput.
Arnat pingasut 2013-imi qinerneqarnerpaat qulit akornananniipput, maannali marloriaammik amerlanerulerlutik.
AAMMA ATUARUK Arnat sassartut ikinnerupput
Isumaginninnermut, meeqqanut aturfeqarnermullu tunngasut ukkatarineqarnerunerat qineqqusaartunut arnanut iluaqutaasimasoq, qinerneqarluartut ilaata qularutiginngilaa.
- Inuaqatigiinni ajornartorsiutigut annertuut meeqqat atuarfiini, meeqqanut tunngasuteqartut tamakkua initoorujunngorsimagami. Taavalu arnaanerulluta politikkimi taakkuninnga qalluisut, 467-nik qinerneqarluni Kommuneqarfik Sermersuumi kommunalbestyrelsemut ilaasortanngortoq Nivi Olsen taama oqarpoq.
Inunnut tunngassuteqartut eqqartorneqarnerupput
Taamalu oqarnera suiaassuseq naligiissitaanerlu pillugit ilisimatuumit taperserneqarpoq.
- Qineqqusaarnermi oqallinnerni isiginiarneqarnikuupput inuaqatigiinni ajornartorsiutit, soorlu meeqqani sumiginnaaneq, suiaassuseq naligiissitaanerlu pillugit ilisimatooq Marie-Kathrine Poppel taama oqarpoq.
AAMMA ATUARUK Asii qinersinermi qinerneqarnerpaasoq
Arnallu siuariarnerat Kommuneqarfik Sermersuumi ersernerpaavoq, Kommuneqarfik Sermersuummi kommunalbesyrelsiani ilaasortani 19-iusuni qulit arnaalerput, tassalu amerlanerussuteqalerlutik.
Kommune Kujallermi Qeqqatalu Kommuniani kommunalbestyrelsini ilaasortanut issiavinni 15-usuni arnat arfinillinni issiasalertussanngorput.
Qaasuitsoq Avannarlermi allaaneruvoq. Kommunalbestyrelsissamummi qinerneqartuni 17-isuni 13-it angutaapput.
Qaasuitsoq Kujallermilu arnat suli ikinnerupput. Kommunalbestyrelsissamimi ilaasortassani 15-iusuni marluinnaat arnaapput.
Tassungalu atatillugu suiaassuseq naligiissitaanerlu pillugit ilisimatooq ima nassuiaateqarpoq:
- Piniartoqarfinni aalisartoqarfinni angutit tassani isiginiarneqarnerusimasut qinerneqarnerullutillu, Ilisimatusarfimmi suiaassuseq naligiissitaanerlu pillugit ilisimatooq Marie-Kathrine Poppel taama oqarpoq.
