Politikki

Kommunini politikerit: suliffissarsiuussinissaq ajornarnerulersinnaavoq

Kommune Kujalliup Kommuneqarfik Sermersuullu Naalakkersuisut siusinaartumik soraarnerussutisiallit pisinnaasut sulilerseqqinniarneqarnissaannik siunnersuuteqartoqarnerat isumaqatigaat. Taamaakkaluartorli illoqarfinni suliffissarsiuussinissaq ajornarnerulissasoq kommunini politikerit ernummatigaat.

Kommuneqarfik Sermersuumi artukkerneqarnissaq ernummatigineqarpoq.

Allattoq Sara K. Jakobsen

septembarip 19-at 2014 17:10

- Ajorinngittorujuuarput. Una aporfigiinnarparput sumiiffiit tamani suliffissanik nassaarniarneq ajornakusoortussaagami, Kommuneqarfik Sermersuumi kommunalbestyrelsemi ilaasortaq IA-meersoq, Iddimanngiiu Biango, KNR-imut taama oqarpoq.

Kommune Kujallerli neriulluarneruvoq.

- Neriuutigivara taamanimut atuleriarpat, periarfissat misissorluareernerisigut, suliffissanik nutaanik nassaarsinnaaneq aamma anguneqarsinnaajumaassasoq, Kommune Kujallermi kommunalbestyrelsemi ilaasortaq, Simon Simonsen, oqarpoq.

Aamma atuaruk VIDEO Martha Lund Olsenip siusinaartumik soraarnerussutisiallit sulisinnaassuseqartut sulilersikkusuppai

- Suliffissaaleqineq annertuvoq, kisianni allatigut periarfissanik ujartuinikkut isumaqarpunga aamma periarfissaassasoq.

Kommuneqarfik Sermersooq naligiissitsiniarneq pissutaalluni aningaasaqarniarnikkut artukkinneqareertoq, Iddimanngiiu Biancop oqaatigaa.

Aamma atuaruk Siusinaartumik soraarnerussutisialik ilungersorluni suleqqittoq

Naalakkersuisullu siunnersuutaat siusinaartumik soraarnerussutisiallit pisinnaasut suliffissarsiunneqassasut, kommunimut saniatigut artukkiissutaasinnaasoq ernumaatigaa.

- Kisitsisit taaneqartut piviusorsiorpalaanngissorivagut. Taamaattumik aningaasatigut sipaarniarfigineqassappata uatsinnut nanertuutaanissaa ernummatigisorujussuuarput, Iddimanngiiu Bianco oqarpoq.