Kommune Kujalliup aalisartut piniartullu kiffartuussinissamik isumaqatigiissuteqarfigigai

Kujataani aalisartut piniartullu ataatsimut peqatigiiffiat aallartinneqarpoq kujataani kalaalimeerniarfiit umiatsialiorfiillu januaarip aallaqqaataani 2017-imi akisussaaffigilernissaat ingerlanneqarnissaallu siunertaralugu.

Isumassarsiaq pilersinneqarpoq aalisartut piniartullu pitsaanerusumik siunnersorneqartarnissartik pillugu decembarimi 2015-imi isumasioqatigiinneranni, soorluttaaq Kommune Kujallermi inuussutissarsiornerup iluani nutarsaanissamut ineriartortitsinissamullu taperneqartarnissamut periarfissat pitsanngorsaavigineqarnissaat kissaatigineqarsimalluni.

Kiffartuussinissamik isumaqatigiissut aqqutigalugu KAPS kommunimi tamarmi aalisartut piniartullu siunnersorneqarnissaat aamma akisussaaffigilertussaassavaat, soorluttaaq ataatsimut
peqatigiiffiup Kommune Kujallermi inuussutissarsiutip nutarsarnissaanut ineriartortinneqarnissaanullu aningaasaliissutit ingerlatarissagai.

-  Ullumikkut aalisartut piniartullu peqatigalugit alloriarneq pingaarutilik, angisooq pitsaalluinnartorlu anguarput. Uagut Kommune Kujallermit pitsaasumik ineriartornermik kinguneqarnissaa qilanaareqaarput, tassami aalisartut piniartullu akisussaaffeqarnerulissammata, kiffaanngissuseqarnerussallutik ineriartornerlu pitsaasoq anguniarlugu tulluarsorisaminnik iliuuseqarsinnaanngorlutik, borgmester Jørgen Wæver Johansen oqarpoq.