KNR KNR Voice nuna tamakkerlugu tusaaneqarsinnaalissaaq
Siunissami KNR Voice internetikkut, mobiilinut APP atorlugu kiisalu fjernsynikkut tusaaneqarsinnaalissaaq, kisiannili FM aqqutigalugu KNR Voice suli tusaaneqarsinnaassanngilaq.
– KNR Voicep tamatigoornerusumik tusaaneqarsinnaalernissaa soorunami nuannaarutigaarput, tassami inuusuttut kanalimik taassuminnga naalaarsinnaalersut amerlanerulernissaat aqqutissiuunneqarmat, taama oqarpoq KNR-ip pisortaa Søren Lennert Mortensen nangillunilu, - TELE Greenlandimik suleqateqarluarnerup kingunerisaanik ataasinngorpat 16. marts nal. 12.00-imiit kanalip ammarnissaa naatsorsuutigaarput.
– 16. marts aallarnerfigalugu inuusuttut radioat taaguteqalerpoq KNR Voice, taamaalillunilu KNR-ip aallakaatittagaanut ilaalernera naqissuserneqarluni, taama nalunaaruteqarpoq radiop pisortaa Masaana Egede, nangillunilu - pissanganartorpassuarnik pisoqassaaq ulloq taanna pisortatigoortumik qanoq aallakaatitsisarnissarput saqqummiutilerutsigu. Kikkulluunniit tikilluaqquagut kanalip nutaap atuutilerneranut siunnersuutinit isumassarsianillu immersueqataanissaannut.
Voice-p aallakaatitsisarfia Issortarfik 1-imi KNR-ip illuutaanut nuunneqareerpoq, kanalilu nutaaq KNR-ip ingerlanneqarneranut ilanngullualereerpoq.
– KNR-ip inuusuttunut kanalertaavata sisamanngormat kingullermi Qulaarpaa-mi peqataasunit ilassilluarneqarnera KNR-imi nuannaarutigeqaarput. Inuusuttut periarfissinneqarput imminnut soqutigisaminnullu tulluuttumik radioqalernissaminnut, Søren Lennert Mortensen paasissutissiivoq.
– Radiokkut nutaamik inuusuttunut KNR-ip nutaamik kanaliliornera Qulaarpaa-mi peqataasunit nersualaarneqarpoq isumaqatigineqarlunilu, KNR-ip pisortaa oqarpoq naggasiillunilu oqarluni, - piffissami aggersumi nunatsinni tusagassiuineq pillugu oqallinnissat KNR-ip tungaaniit qilanaaraagut. Tusagassiuinermik suliaqartut suleqatigiinnissaat pisariaqarpoq, suleqatigiinnermi aqqutaassaaq nunatsinni tusagassiuuteqarnikkut ineriartortitsinerup sinaakkusersornissaanut.
Paasissutissanik sukumiinerusut pissarsiarineqarsinnaapput uku saaffigalugit:
Søren Lennert Mortensen Masaana Egede
Pisortaq Radiop pisortaa