KNR nutaamik pisortassarsisoq
KNR nutaamik pisortartaalerpoq. Annga Lynge pisortatut 2023-mi septembarip aallaqqaataani aallartissaaq.
Annga Lynge Københavnip Universitiitianiit Filminik Cand. Mag.-itut ilisimatusarnermik ilinniagaqarpoq aamma aqutsinermik, aningaasanik aqutsinermik, iliuusissatut pilersaarusiornermik kiisalu nutaaliornernik ingerlatsinernik annertuumik misilittagaqarluarpoq.
Annga Lynge tusagassiuutinut, kalaallit kulturiannut inuiaqatigiinni pissutsinut kiisalu politikkikkut aalajangiinermut tunngasunik illuatungeriinnillu assigiinngitsunik isumaqatigiinniartarnermut ilisimasaqarnera tunngavigalugu pisortassatut toqqarneqartut, KNR-imi siulersuisut siulittaasuat, Mette Steenholdt tusagassiuutinut nalunaarummi oqarpoq.
- Pisinnaasat taakku KNR-imi pisariaqartippagut, tusagassiuutinut silarsuaq ataavartumik ineriartortoq pakkersimaarniarlugu, tassani Annga Lynge qitiusumik inissisimassaaq iliuusissamik nutaamik ineriartortitsinissamut sulisut siulersuisullu peqatigilluinnarlugit, kiisalu Namminersorlutik Oqartussanik innuttaasunik kiffartuussinissamik isumaqatigiissummik isumaqatigiinniaqqinnissamut tunngatillugu, Mette Steenholdt oqarpoq.
Annga Lyngelu sulilernissaminut qilanaarpoq.
- Piffissani makkunani nunami nunanilu allani pisut annertoorujussuit ingerlapput, inuunitsinnut sunniuteqartut, maniguullunga aamma qilanaarlunga, KNR-imut pisortatut atorfinissaanga, taanna oqarpoq, nangillunilu:
- KNR pingaarutilinnik nuimasutullu suliassaqarpoq aamma suliffeqarfittut sulisunik annertuunik pikkorissuseqartunik pisariaqartitsivoq aamma sulillunga aallartinnissannut qilanaarpunga KNR-illu inerisarnissaanut atuisunut tamanut iluaqutaasussamik tapersiinissannut.
Annga Lynge Qeqqata Kommuniani ilinniartitaanermut pisortaanikuuvoq, kingornalu ilinniarfimmi pisortaalluni.
KNR-ip pisortarisimasaata, Karl-Henrik Simonsenip pisortatut atorfik aggustip 31-ani qimassavaa. Taassuma ilaquttani Danmarkimut nooqatileramik soraarniutini februaarimi tunniuppaa.
Karl-Henrik Simonsen KNR-imi 2016-imi apriimili pisortaalerpoq.
