KNR-imi siulersuisuni ilaasortaq tunuarpoq

KNR-imi siulersuisuini ilaasortap, Mariia Simonsenip, qatanngutaa Karl-Henrik Simonsen apriilip aallaqqaataani KNR-imi pisortatut atorfinissaaq. Taamaammat Mariia Simonsen siulersuisunit tunuartussanngorpoq.
januaarip 06-at 2016 17:00

Karl-Henrik Simonsen KNR-imi pisortanngussasoq KNR-ip siulersuisuini siulittaasup ataasinngormat suaarutigaa. Pisortanngortussaq Tele-Postimi sulisoqarnermi 2006-imiilli pisortaasoq KNR-imi pisortanngortussanngorpoq.

Karl-Henrik Simonsenip qatanngutaa Mariia Simonsen KNR-ip siulersuisuini ilaasortaavoq. Taamaammat siulersuisuni ilaasortaq ataaseq tunuartariaqalertoq siulersuisuni siulittaasoq oqarpoq.

Aamma atuaruk Karl-Henrik Simonsen KNR-imi pisortanngussaaq

- Qatanngutigiit qanigisariittut taamatut inissisimasinnaanngillat taamaattumik Karl-Henrik Simonsen pisortassatut aaliangiukkatsigu allatut ajornartumik Mariia Simonsen siulersuisuninngaanniit tunuartariaqassooq, Nukaraq Eugenius oqarpoq.

Mariia Simonsen KNR-imi pisortassarsiornermi peqataasimanngitsoq siulersuisuini siulittaasup erseqqissarpaa.

Aamma atuaruk KNR-ip sipaartariaqarnera Nivi Olsenip ajuusaarutigaa

- Pisortassasiornitsinni akuunngilluinnarpoq Karl-Henrik Simonsenip oqaluuserineqarnerani aamma allat piukkunnartut oqaluuserineqarnerini akuutinneqanngilaq.

KNR-ip siulersuisui tallimanik ilaasortaqarput.

Mariia Simonsenilu ilisimatusarfimmiit KNR-ip siulersuisuini ilaasortatut toqqagaavoq, tunuartussanngormallu kimit taarserneqassanersoq suli aaliangiunneqarsimanngilaq.

- Kina paarlattaassanersoq suli naluarput, KNR-ip siulersuisuini siulittaasoq Nukaraq Eugenius oqarpoq.