KNR-ip sipaartariaqarnera Nivi Olsenip ajuusaarutigaa

Nunatsinni aningaasaqarneq pitsanngoriaateqanngippat aappaagu sipaarniartoqaqqittariaqassasoq kultureqarnermut naalaakkersuisup oqaatigaa.
Assi © : Jonas Løvschall-Wedel/KNR
januaarip 05-at 2016 12:01

KNR-ip sipaaqqusaanera atortutigut ajutoornerit 2016-imi amerlanerussasut KNR-ip siulersuisuini siulittaasup ippassaq ilimasaarutigaa. Tassa aningaasat 700.000 koruunit atortunut nutarterinermut atorneqartussaagaluartut sipaarutaasussanngormata.

Kultureqarnermut naalakkersuisup Nivi Olsenip sipaartariaqarneq ajuusaarutigaa, Naalakkersuisoqarfiilli sipaartariaqarnerisa kingunerisaanik immikkoortortaqarfiit tamarmik kalluarneqartussanngornerarlugit.

- Ajuusaarutigisorujussuuara taama inissisimaneq aamma siunertarinngilara ajorseriaanissaq, Kultureqarnermut naalakkersuisoq, Nivi Olsen, oqarpoq.

Aamma atuaruk Atortunik ajutoornerit amerlanerulissapput

Naalakkersuisoqarfiit tamarmik procentimik ataatsimik sipaartariaqarmata susassaqartut tamarmik eqqorneqassasut taassuma aamma oqaatigaa.

- Naalakkersuisoqarfiit ataaniittut susassaqarfiit tamavimmik 1 procent missarpiaani sipaarfigineqassapput. Taamaalillutik allat sakkortunerusumik eqqorneqarnatik.

Aamma atuaruk Karl-Henrik Simonsen KNR-imi pisortanngussaaq

KNR-ip siulersuisuisa siulittaasuata atortutigut akulikinnerusumik ajutoortoqartarnissaanik ilimasaarutaanut ima akivoq:

- Tusarnaartartut isiginnaartartullu eqqarsaatigisariaqarpaat nammineq qanoq iliuuseqarsinnaaneq. Suliffissaniguna suliffiusunik tigujumanngisarpassuarisartakkatsinnik immaqa suliartorsinnaasariaqalissuugut aningaasat Nunatta karsianut isaalissappata.

Sipaartariaqalerneq kingullerpaajujunnanngitsoq aamma oqaatigaa.

- Sipaarniarnerit ingerlaarusaassapput ukiorpassuit tulliuttut nikittoqanngippat, Nivi Olsen oqarpoq.