KNR KNR-imi radio nutaaq inuusuttunut tunngasuuvoq
- Siunertaavoq nipilersukkanik, akunnikkaartumik nutaarsiassanik aallakaatitassianillu naalaartartunut inuusunnerusunut saaffiginnittunik aallakaatitsisarnissaq, KNR-imi pisortaq Søren Lennert Mortensen oqarpoq nangillunilu:
- Taamaaliornikkut pingaarnertut kanalip KNR Radiup suliassani pingaarnerit qitiutilersinnaavai, kanalillu nutaap inuusuttut pisariaqartitaat isumagisinnaallugit, tamatumunnga ilutigitillugu nutaarsiassanik aamma innuttaasunut tulluartunik aallakaatitassianik radiumik atuineranni pissarsitittassallugit.
Taamaammat KNR 500.000 koruuninik lokalradiomut Voice of Greenlandimut aningaasaliissuteqarpoq, taamaalillunilu pigisai nalillit tamaasa tigusimallugit, tassunga ilanngullugit pilerisaarisarnissamut isumaqatigiissutigineqarsimasut tamaasa, taamaaliornikkut radiukkut kanali nutaaq 2015 tamaat aningaasartuutaassanani.
Voice of Greenlandip pisiarinerani nalinga kukkunersiuisartunit Deloittemit nalilersorneqarsimavoq. Deloittellu nalunaarutaa aallaavigalugu KNR-ip nalilerlugu nutaamik pisineq tamanna aningaasatigut pitsaasuusoq annertusarneqarsinnaasorlu.
- Voice of Greenlandip toqqarneqarnera nutaamik kanalimik nangillugu ineriartortitseqqiinissamut pitsaasumik tunngavissaqalerpoq, taamatut piffissamik, sulisussanik aamma aningaasanik naleqartunik allanik sipaaruteqarnatta naalaartartut inuusunnerusut kissaataat naammassiniarlugit periutsimik nutaarluinnarmik ingerlataqalernermi tamakkuninnga piumasaqaateqartussaagaluartoq, Søren Lennert Mortensen oqarpoq.
Pisinermut ilaapput nipilersuusiortarnermut pilersaarut, nipilersuutinik nalunaarsuiffik, atortut, nittartagaq, App, sulisut aamma nittarsaassisarnermut aallaavik ineriartortinneqarnera naammasseriigaq, ilaalu ilanngullugit.
Radiukkut aallakaatitsisarnermut aallaavik nutaaq pilerisaarutigut ukiumut 1 millionit koruunit missaannik isertitaqartassaaq, tamannalu KNR-ip aningaasalersorneqarneranut tapertaavoq tak. Radiukkut tv-kkullu aallakaatitsisarneq pillugu Inatsisartut Inatsisaat nr. 7, 8. juni 2014-imeersoq § 36:
KNR-ip ingerlatsinera Nunatta karsianit tapiissutit, pilerisaarutit, aallakaatitassiat aningaasalersorneqartut suliatigullu allatigut isertitat aqqutigalugit aningaasalersorneqarpoq.
Annertuumik sinneqartoorutaanissaa isumaanngilaq, kisianni takkukkumaartussat imarisaata ineriartortinneqarneranut naalaartartunut inuusunnerusunut sammisut ineriartortinneqassapput.
Taamaaliornikkut kanalip pingaarnerup KNR Radiup missingersuutai sunniuteqarfigineqassanngillat, kisianni aallakaatitassiortarnernit “inuusuttuunerusunut” imalinnit aningaasanik atorneqartussaagaluartunik illikartitsissaaq, taakkulu kanalimi pingaarnermi aallakaatinneqartartunut annertusaatitut aamma pitsanngorsaatitut atorneqassapput.
Voice of Greenlandip pisiarineqarneranut atatillugu radiup piginnittorisimasaa Claus Nissen KNR-imi tuniniaanermut pisortatut atorfinitsinneqarpoq.
Taamaalilluni Claus Nissen KNR-imi tusagassiornermut aallaaviit pigineqartut sorliuneri apeqqutaatinnagit pilerisaarutinik tuniniaassaaq, aamma radiukkut kanalip nutaap inuusuttunut sammisup nuukkiartuaarnerani ikiuutissalluni. Claus Nissen siornatigut KNR-imut attuumassuteqarsimavoq tuniniaanermut siunnersortitut august 2013-imiilli.
- Uagut aatsaat qilanaarnerulerpugut innuttaasunik sullissinissami inuusuttunut naalaartartutsinnut akisussaaffitsinnik naammassinninnissamut, Søren Lennert Mortensen naggasiivoq.
Paasissutissanik annertunerusunik pissarsiniaruit attaveqarfigiuk KNR-imi pisortaq, Søren Lennert Mortensen på telefon: 36 15 00 imaluunniit på mailikkut: smo@knr.gl
