VIDEO KNR-imi Inga Hansen naggataarpoq

Ukiut 27-t KNR-imut attuumassuteqareerluni allamik misileerusulluni suleqaterput Inga Hansen tallimanngormat naggataarpoq. Inga isiginnaartartutsinnit qularnanngitsumik maqaasineqassaaq minnerunngitsumillu maani suleqataasunit uagutsinnit.
Allattoq Dorthea Johansen
decembarip 22-at 2014 15:24

Pisarnermisut ullaakkut ataatsimeeqataavoq.

 

Inga Hansen tusagassiortutut ukiut katillugit 27-t KNR-imi sulivoq. Aqqutilli nutaat misilissallugit aalajangerpoq.

- Islandimut suliartulerpunga, tassa Islandimiut aperinikuugaminnga ukiut marluk qaangiupput, Islandimi sulerusunnersunga. Nangaasarlungalu pilerisarlungalu aalajangerama, OK misilissavara, Inga Hansen oqarpoq.

 

Inga Hansenip naggataamik KNR-imi sulinermini kulturimut tunngasunik ilanngutassiorpoq. KNR-imi suleqataasut tamanna maluginngitsuunngilaat.

- Eqqumiissooq ulluinnarni takussaarutsigu, tassa inuk qiimasuugami. Taavalu qiimanerata pilersitaanik uagut sunninneqartaratta, maqaasinngitsoornavianngilarput, Apollo Jeremiassen oqarpoq.

 

Suleqataasullu inuulluaqqusillutik tammaviuttussaanik tunniussillattaarput.

- Ingap ilanngutassiai Qanoruumi maqaasissavakka. Allaanerusumik oqaluttualiortarpoq, qannartaali attuillugu oqaluttuartarpoq. Inga aamma kammalaatitut maqaasissaqaara, Niels Krogh Søndergaard oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq