Tusarnaartitsineq ataqatigiilersitsisoq
Erinniortup talliortullu nipaa sallaatsoq. Erinarsoqatigiit nipaat imartuut.
Erinniarsuit, taallat tussiutillu tusarnaartitsinermi "Nordic Blue Lights"-imi tusarnaarneqarsinnaassapput.
- Qilanaaqaanga, soorunalimi aamma pissangallunga.Sapaatip akunnerata naanerani sungiusarluaqaagut malugisinnaavaralu piareersimalerluta, Zenica Gosvig Larsen, Nordisk Koncertkorimi peqataasoq oqarpoq.
Nipilersoriaatsit ileqqullu assigiinngitsut
Tusarnaartitsineq nipilersoriaatsinik ileqquusunillu assigiinngitsunik ataqatigiilersitsivoq. Tassanilu Angu Motzfeldtip erinniai allatut nipilerlugit atorneqassapput erinniallu nutaat suli saqqummernikuunngitsut ilisaritinneqassallutik. Erinniarsuit kalaallillu tussiutai appissimaagassat ilagissavaat.
- Nipilersoriaatsit assigiinngitsut suliaralugit pissanganaqaaq, nipilersortartut piginnaasaat assigiiinngitsut suleqatigiinnerisigut nutaarluinnarmik pilersitsimmata. Erinarsoqatigiinni erinarsorluni tusaallugit nuannaajallannaqaat, Zenica Gosvig Larsen, Nordisk Koncertkorimi siulersuisuni ilaasortaasoq oqarpoq.
Nipilersortartut Jan de Vroede Charlie Charpirolu saniatigut Islandimiu saxofonertartoq Sigurdur Flosason kiisalu qataanngutigiit Ole aamma Peter Kibsgaard Angu Motzfeldtimut ingiortaallutik peqataassapput.
AAMMA ATUARUK Angu Motzfeldt Nordisk Koncertkorilu qaqutigoortumik suleqatigiittut
Nipilersoqatigiinneq avammut nittarsaannissaa, Nordisk Koncertkorimi siulersuisut neriuutigaat:
- Nipilersortartut nunani allaneersut suleqatigalugit nuannissaqaaq. Tassuunattaaq kalaallit nipilersuutaat avammut ilisaritinneqarsinnaammata, Zenica Gosvig Larsen KNR-imut taama oqarpoq.
Tusarnaartitsineq unnugu Katuami arfineq pingasup qeqqa aallartissaaq.