Kalaallit ilagiivinik pilersitsinissaq danskit ministeriata sulissutiginiaraa
Ministerip paragraf 20 naapertorlugu apeqquteqaammut akissutaa naapertorlugu, nittartagaq Sermitsiaq.AG taama allaaserisaqarpoq.
Danmarkimi palasinik kalaallinik amerlanerusunik atorfinitsitsinissaq taamatullu aamma ilagiinnik amerlanerusunik pilersitsinissaq ukiuni arlalinni kissaatigineqarpoq.
PAASISSUTISSAT:
Palasit kalaallisut oqaasillit Danmarkimi ullumikkut marluupput. Aappaa Namminersorlutik Oqartussanit aningaasalersugaavoq kalaallinillu Danmarkimiikkallartunik sullissisuulluni.
Aappaa danskit ilageeqarnermut ministereqarfiannit Arhus Stiftip ataani atorfeqartitaavoq, Danmarkimilu kalaallit najugaqavissut tamaasa sullitassaralugit.
Ilagiit sinnissaat pillugit inatsimmi § 5: "Naligiissitaanermut ilageeqarnermullu ministeri biskoppimik isumasiuereernermini aalajangiisinnaavoq inunnut immikkut ilagiiusunut ilagiit sinniissaannik pilersitsisoqassasoq. Ilagiit sinniisaat taama ittut katitigaanerannut qanorlu pisinnaatitaanerannut malittarisassat Naligiissitaanermut ilageeqarnermullu ministerimit aalajangersarneqassapput."
Najoqqutarisaq: Retsinformation.dk
Socialdemokraatit ilageeqarnermut oqaaseqartartuata, Karen Klintip, ilagiit sinniisaat pillugit inatsimmi malittarisassap immikkut ittup atorneqarsinnaanera kingullertigut siunnersuutigaa. Malittarisassaq pineqartoq inuiaqatigiinni eqimattat immikkut ittut namminerisaminnik ilageeqalernissaannik periarfissaqartitsivoq.
Ilageeqarnermullu ministerip nunanut allanut tunngasunut ministereqarfik oqaloqatigeerlugu tamatuma misissuiffigineqarnissaa piareersimaffiginerarpaa.
- Tassani atuarneqarsinnaavoq, nunanut allanut tunngasunut ministereqarfiup paasinninnera malillugu kalaallit ima immikkooruteqartigisut, inuiattut immikkoortutut taaneqarsinnaallutik. Kalaallit Nunaalli naalagaaffeqatigiinnut ilaavoq, tamannalu pissutigalugu kalaallit Danmarkimiittut inuiannut Danmarkimi ikinnerussuteqartunut allanut naleqqiullugit immikkut ittumik inissisimapput.
Danskit ilageeqarnermut ministereqarfiata Namminersorlutik Oqartussat suleqatigalugit kalaallit ilagiivi aaqqiissuteqarfiginissaat sulissutigigaa ministerip aamma ilisimatitsissutigaa.
