Politikki

Kinguaassiutitigut kanngutsaatsuliortartut katsorsarneqartalissasut

Kinguaassiutitigut atornerluisimasut naapertuutinngitsulioqqinnginnissaat pillugu katsorsarneqassasut Naalakkersuisut sisamanngornermi saqqummiussinermi oqaatigaat.

Allattoq Inge S. Rasmussen

juulip 03-at 2017 12:48

Kinguaassiutitigut kanngutsaatsuliornerit pineqartillugit eqqunngitsuliorfigineqarsimasut maannamut ukkatarineqarsimapput.

Tarnip pissusaanik ilisimasallit 2013-imi angalasalernerminni inersimasut 500-it missaanniittut meeraanerminni kinguaassiutimikkut atornerlunneqarsimanerminnik kingunerlutsitsisut katsorsarsimavaat.

Naapertuutinngitsuliorfigineqarsimasulli kisiisa katsorsarunnaarlugit pinerlussimasut aamma katsorsarneqartalissapput.

Pitsaaliuinermik suliaqarnermi tamanna pingaaruteqartoq isumaginninnermut ilaqutariinnermullu naalakkersuisoq, Sara Olsvig oqarpoq.

Taassuma kanngutsaatsuliorsimasunik katsorsaasalernissamut nunani allani ilisimasat tarnillu pissusaanik ilisimasallit angalasarnerannit misilittakkat aallaavigineqassasut oqaatigaa.

- Tassa massakkut uanga naalakkersuisoqarfinni naalakkersuisoqarfinnilu allani katsorsaanermut ilisimasagut annertoorujorujussuanngorsimapput, isumaginninnermut naalakkersuisoqarfimmi kinguaassiutitigut atornerlugaasimasut kingunerlutsitsisut inersimasunngoreerlutik katsorsarneqarnerat ingerlavoq, katsorsaanerlu taanna assut ilinniagaqarfigisimavarput.

AAMMA ATUARUK Seksuelt krænkede kan til hver en tid melde deres gerningsmand

Aningaasat missingersuutinit pissarsiarineqassasut

Tarnip pissusaanik ilisimasallit angalasarnerat 7.6 millionit koruuninik missingersuuteqarfigineqarpoq, Aningaasanullu inatsimmi 2020-ip tungaanut ilaalluni. Taassuma saniatigut Alliamut millionit koruunit missaat immikkoortinneqarsimapput.

Sara Olsvigip kanngutsaatsuliortartunut katsorsaasarnissamut aningaasat atorneqartussat ilaqutariinnermut naalakkersuisoqarfiup Aningaasaqarnermut Inatsimmi missingersuutaannit pissarsiarineqassasut naatsorsuutigaa.

- Periarfissaasut aningaasaliissutillu pioreersut iluanni, uungali killissagutta takusinnaanerlutigu aningaasaliissutinik suli annertunerusunik pisariaqartitsissalluta taava soorunami aamma tamanna Inatsisartuni qinnutigineqarnikuuvoq, Sara Olsvig oqarpoq.

Kinguaassiutitigut pinerlinnerit nalunaarutigineqartartut ukioq kingulleq 29 procentimik qaffapput, nunatsinni politiit ukiumut naatsorsueqqissaarneranni tamanna allassimavoq.

Politiit naapertorlugit inuiaqatigiinni kanngutsaatsuliortarnerit ammanerusumik eqqartorneqartalernerat tamatumunnga peqqutaavoq.

AAMMA ATUARUK Kinguaassiuutitigut pinerluttuliornerit 29 procentinik amerleriarput