Kinguaassiuutitigut pinerluttuliornerit 29 procentinik amerleriarput

Kinguaassiuutitigut pinerluttuliornerit nalunaarutigineqartartut nunatsinni amerleriarput.

Tamanna Kalaallit Nunaanni politiit ukiumoortumik 2016-mi nalunaarusiaanni marlunngormat saqqummiunneqartumi takuneqarsinnaavoq.

Inuit 1000-ugaangata kinguaassiuutitigut pinngitsaaliisutut nalunaarutigineqartut Danmarkimut sanilliullugit nunatsinni quleriaammik amerlanerupput.

Eqqartuussissuserisup illersuisuusartup Ulrik Blidorfiup oqarnera naapertorlugu inuiaqatigiinni sumi inissisimaneq, ukiut atorfeqarnerlu apeqqutaatinnagu kinguaassiuutitigut pinerluttuliortarneq ajornartorsiutaavoq.

- Nunatsinni sumiluunniit kinaluunniit kinguaassiuutitigut pinerluttuliornissamut killittoortarpoq,

Eqqartuussissuserisoq Ulrik Blidorf taama oqarpoq.

Blidorf kinguaassiuutitigut pinerluttuliorsimasunut illersuisuusarpoq aamma piffissap ilaani kinguaassiuutitigut pinerluttuliorfigineqarsimasunut nunarput tamakkerlugu illersuisutut eqqartuussissuserisuusarpoq.

Kalaallit Nunaanni politiit ukiumoortumik nalunaarutaat naapertorlugu Ulrik Blidorf suliassaaleqinavianngilaq.

Pinerluttuliornerit 29 procentinik amerleriarput

Kinguaassiuutitigut pinerluttuliornerit 2015-mi 295-usimariarlutik 2016-mi 381-nut amerleriarput, amerleriaat 29 procentiulluni.

Ulrik Blidort isumaqarpoq kinguaassiuutitigut pinerluttuliornerit nalunaarutigineqartarnerisa annertusinerannut pissutaasoq ammanerusumik oqaluuserineqartalersimanera.

Kinguaassiuutitigut pinerluttuliortarnerit eqqartuussivinnut suliassanngortinneqartut malunnartumik amerlatsikkiartorput, oqaluuserineqarnissaannut ammanerulersimaneq pissutaasoq Ulrik Blidorfip nalilerpaa.

Blidorf isumaqarpoq kinguaassiuutigut pinerluttuliornerit nalunaarutigineqartut amerleriarnerannut pissutaasoq ilaatigut atuarfinni isumaginninnermut siunnersortinik atorfinitsitsisoqarsimammat ingammillu meqqat illersuisuata Kalaallit Nunaanni tamarmi angalalluni meeqqat pisinnaatitaaffii pillugit paasisitsiniaasimammat aamma suliffeqarfinni kinguaassiuutitigut ileqqorissaarnissamik aalajangersagaliortoqarsimanera.

- Suliat pitsaasut takkua ingerlaannartariaqarput, innuttaasut akornanni kinguaassiuutitigut pinerluttuliunnginnissamut killissarititaasut ersarissarneqartariaqarmata eqqartuussissuserisoq Ulrik Blidorf taama oqarpoq.

Pinerluffigitissimasunut pinerluttuliorsimasunullu ikiorsiinissaq annerusoq

Kinguaassiuutitigut pinerluttuliorsimasut pinerluffigitissimasullu annertunerusumik ikiorneqartariaqarnerannik Ulrik Blidorf ujartuivoq. Pinerluttuliorsimasut pinerluffigineqarsimasullu tarnip pissusaanik ilisimasalinnit ikiorneqartarnerat nukittorsarneqartariaqartoq Blidorf isumaqarpoq.

Kinguaassiuutitigut pinerluttuliornerit nalunaarutigineqartarnerisa amerlisimanerat pillugu Qanooorumi ilanngutassiaq unnugu takuneqarsinnaavoq.