Kim Kielsenip Nalaakkersuisut kiffartuussinissamik isumaqatigiissutaat akerlilersorai

Naalakkersuisut ilaasunik angallassineq pillugu kiffartuussinissamut isumaqatigiissutinik suliaat Naalakkersuisut siulittaasuata, Kim Kielsenip nammineq akerlilersulerpaa.

Allattoq Thomas Munk Veirum, Jens Thorin

oktobarip 13-at 2016 05:11

Kim Kielsenilumi aamma Naalakkersuisoqatini kingullerpaatigut akerlilersorlugit sulivoq.

Aningaasaqarnermut naalakkersuisoqarfimmiit nuna tamakkerlugu pilersaarusiaq marlunngormat Qanoruukkut tamat isiginnaarneranni igitassanngortippaa. Taava attaveqatigiinnermut naalakkersuisoqarfimmiit ilaasunik angallassineq pillugu kiffartuussinissamut isumaqatigiissut maanna isornartorsiorpaa.

Kim Kielsenip, Siumup siulittaasuatut atsiorluni tusagassiutinut allagaqarpoq, ilaatigut ima allassimasumik:
Siumumiilli erseqqissaatigissavarput angallannikkut atugarisaasunik ajornerulersitsinissaq akisunerulersitsinissarlu siunertarinngilluinnaratsigit, Kim Kielsen allappoq nangillunilu:

Taamaattumik naatsorsuutigilluinnarparput 2017-imut aningaasanut inatsisissaq novembarip qiteqqunnerani Inatsisartunit naammassillugu suliarineqartinnagu angallassinikkut kiffartuussinissanut isumaqatigiissutissat silaannakkut imaatigullu angallassinertigut ajornerulersitsinngitsumik naammassineqarsinnaanissaat.

Aamma atuaruk VIDEO Nuna tamakkerlugu pilersaarusiaq Kim Kielsenip atortussaajunnaarsippaa

Kim Kielsen Inatsisartuni septembarip 28-ani akunnermi apeqquteqarfissami oqarpoq, kiffartuussinissamut isumaqatigiisutit Naalakkersuisuni isumaqatigiillutik suliarigitik:

Kim Kielsen annerusumik oqaaseqaqqullugu KNR-imiit attaveqarfiginiarparput, paaserusullugu ajorseriaatsit sorliit peerneqassanersut Kim Kielsenip naatsorsuutigineraa, minnerungitsumillu tusarusullugu, sooq naalakkersuisut siulittaasuattut siusinnerusukkut, tassalu isumaqatigiissutit naammassillugit isumaqatigiinniutigineqartinnagit qisuariarsimannginnersoq.