VIDEO Nuna tamakkerlugu pilersaarusiaq Kim Kielsenip atortussaajunnaarsippaa
Nuna tamakkerlugu pilersaarusiaq 2016 Inatsisartuni oqaluuserineqartussaagaluarluni naalakkersuisunit ippassaq marlunngornermi oktobarip ulluisa qulinganni peerneqarpoq.
Nutserneqarnera, oqaatsillu atorneqartut ilaatigut tulluarpallaarsimannginnerat pissutaalluni oqaluuserisassatut saqqummiunneqarsinnaanngitsoq, Naalakkersuisut siulittaasuata Kim Kielsenip Qanoruumut ippassaq marlunngornermi oqaatigaa. Qaqugulu oqaluuserineqartussanngorsinnaanersoq aperineqarami ima akivoq:
- Uani massakkut nutaaq suliarineqassooq. Ukiut tamaasa taamattoq saqqummertartussaavoq, inassut naapertorlugu, kisianni massakkut naatsorsuutigaarput 2017-imi aatsaat takkuttoqassasoq. Imaappoq 2017-imoortoq suliaralugu maanna ingerlanneqalereerpoq, Naalakkersuisut siulittaasuat Kim Kielsen taama oqarpoq.
Ukioq mannalu saqqummiussisoqassannginnersoq aperineqarami ima akivoq:
- Tassa maannakkut saqqummertoqarnavianngilaq, Kim Kielsen taama oqarpoq.
Aamma atuaruk Nuna tamakkerlugu pilersaarusiaq ukiaanerani oqaluuserisassaajunnaartoq
Politikkikkut tulluanngitsunik oqariartuuteqarfiusoq
Naalakkersuisut siulittaasuata Nuna tamakkerlugu pilersaarusiaq allannguuteqartillugu saqqummersinneqassasoq aamma oqaatigaa:
- Soorunami allannguuteqassooq, aamma uani assigiinngitsut eqqarsaatigalugit, periarfissarititat allallu, qulaajagassat qulaajarneqarlutik.
- Nammineq uani takusinnaavarsi (Nuna tamakkerlugu pilersaarusiaq 2016, aaqq.) politikkikkut illuatungaatigut tulluarpallaanngitsunik oqariartuuteqartoq tassani. Nalimmassarneqassapput allatigullu, kisianni una pingaartupilussuuvoq; assigiinngitsut qulaajassallugit, taava tassanngaanniit politikkikkut alloriarfissanut tunngatillugu sakkussaqartoqalissooq, Naalakkersuisut siulittaasuat Kim Kielsen, Qanoruumi ippassaq unnukkut apersorneqarami taama ilaatigut oqarpoq.
