Birna pillugu suliaq: Kilisaammi inuttat 13-it eqqartuussivimmi nassuiaateqassasut

Eqqartuussineq utaqqisaajuarsimasoq eqqartorneqartuarsimasorlu juulip 18-iani aallartissaaq. Eqqartuussinermi siullermi angutip unnerluutigineqartup suleqatai arfineq pingasut, suliamut, nunat assigiinngitsut akornanni malugineqarluartumut, ilisimannittutut nassuiaateqassapput.

Tamatuma kingorna umiarsuarmi inuttut tallimat allat suliamut tunngatillugu aamma nassuiaateqassapput. Taakkulu akornani angut kalaaleq suliamut atatillugu aamma parnaarussaaqqasimasoq nassuiaateqartussanut ilaasoq, unnerluussisussaatitaasoq, Kolbrún Benediktsdóttir KNR-imut paasissutissiivoq.

AAMMA ATUARUK Birnamut tunngatillugu pasisaq pingitsuutinneqartoq

Kilisisaat Polar Nanoq aasaanerani Reykjavikkip umiarsualivianiittussaammat eqqartuussinerup aasaanerani aallarnerneqarnissaanut peqqutaavoq. Polar Nanoq eqqartuussinermi pingaaruteqarluinnartutut inissisimavoq, tassanimi angut kalaaleq islandimiumik arnamik, islandip illoqarfiisa pingaarnersaanni toqutsisimasutut unnerluutigineqartoq.

Angut kalaaleq islandimiup arnap tammaaneqalerneraniilli pasineqarluni januaarip qaammataani tigusarineqarluni parnaarunneqarpoq.

Birna Brjansdottir tammaaneqalernerminiit sapaatip akunnerata kingorna islandip illoqarfiisa pingaarnersaata kujataani, sissami toqungasoq, januaarip 22-ani nassaarineqarpoq.

Islandimiut tusagassiorfii naapertorlugit angummut kalaallimut unnerluussut toqutsisimasutut hashimillu 23 kiilunik eqqusseriarsimasutut unnerluutiginninneruvoq.

AAMMA ATUARUK Kalaaleq toqutsisimasutut hashimillu eqqusseriarsimasutut pasineqarpoq

Birnap angajoqqaavi 10,5 millionit islandske koruuninik tassa danskit koruuninngorlugu 655.000 koruunit missaannik taarsiiffigineqarnissaat unnerluussummi aamma piumasarineqarpoq.

Angut Birna Brjánsdóttirimut toqutsisuunnginnerarpoq.