KANUKOKA Maniitsumiissaaq

Kalaallit Nunaanni Kommunit Kattuffiata allaffeqarfia sumut nuunneqassanersoq aalajangerneqarpoq. Kommuneqarfik Sermersuup KANUKOKA-mit ilaajunnaarnerata kingorna allaffeqarfia Maniitsumiilissaaq.

Allattoq Nutaarsiassaqartitsivik / Nyhedsredaktionen

februaarip 19-at 2016 16:01

- KANUKOKA-p allaffeqarfia Maniitsumi siunissami iniissisimaffeqassaaq.

KANUKOKA-p siulittasua Palle Jeremiassen KNR-imut taama ilisimatitsivoq.

Kommuneqarfik Sermersuup kommunit kattuffiannit ukiortaamit ilaasortaajunnaarnerata kingunerisaanik, KANUKOKA-mi januaarip qaammataani immikkut ittumik ataatsimeersuartoqarmat kommunit kattuffiata Nuummit nuunneqarnissaa aalajangiunneqarpoq.

Aamma atuaruk Aviisi: KANUKOKA Aasiannut nuunneqassaaq

Ataatsimeersuarneq sioqqullugu oqaatigineqaraluarpoq allaffissornikkut suliassat kommuninut ilaasortaasunut agguataarneqassasut, KANUKOKA-mili siulittaasunngortup allaffissornerup allaffeqarfimmit ataatsimit aqunneqarnissaanut januaarimi ataatsimiinnermi tapersersorneqarpoq.

Allaffeqarfiulli illoqarfimmi sorlermi inissisimanissaa taamani aalajangiiffigineqanngilaq.

Aamma atuaruk KANUKOKA-mi suleriaaseq ersarinnerulissaaq

Atorfilittanik suleqatigiissitat allaffeqarfiup sumut nuunneqarnissaanik siunnersuuteqartussat kingorna pilersinneqarput. Suleqatigiissitallu siunnersuutaat KANUKOKA-mi siulersuisut ullumi ataatsimiinneranni saqqummiunneqassaaq.

Kanukoka Aasiannut nuunneqarumaartoq, aviisip Atuagagdliutit tusarfia taama ilisimatitsigaluarpoq, kisianni tassa KANUKOKA-p allaffeqarfia Maniitsumut nuuttussanngortoq, KANUKOKA-p siulittasuata Palle Jeremiassenip KNR-imut ilisimatitsissutigaa.

Aamma atuaruk KANUKOKA-p allaffeqarfia aggulunneqassanngilaq