Kangilinnguit takornariarfinngortinnissaat ilimanarpallaanngitsoq

Feeriartarfik, nunalerinermik ilinniarfik, timersornermik højskole, pinngortitaq pillugu højskole allaallumi qimaasunut inissiisarfik. Periarfissalli taakku piviusunngortinneqarsinnaanngillat avatangiisinik saliisoqartussaanera pissutigalugu, aammali aningaasalersuisussat allanik pissuteqartumik tunuarsimaarput, Visit Greenlandimi pisortaaneq isumaqarpoq.

Inissisimaffialiuna aningaasalersuisartut tunuarsimaarnerannut pissutaanerpaasoq.

- Sumiiffinni alianaatsorpassuarni allani takornariartitsinermik pilersitsisoqarsinnaavoq, tamannalu Kangilinnguanut tunngatillugu aporfiuvoq, taakkunanimi assingusunik takornariartitsisarfiliornissamut aningaasalersuerusuttoqarpoq. Tunumi, Qeqqani, aammalu Kujataani Avannaanilu, Anders Stenbakken taama oqarpoq.

Aamma atuaruk Kangilinnguit takornariarfinngortinnissaannut Illersornissaqarfik apeqqutaassaaq

Aammattaaq Kangilinnguanut angalaniarneq ajornartorsiutitaqarpoq.

- Maannakkutummi inissisimasoqartillugu Narsarsuarmit Kangilinnguanut ungasittupilussuuvoq. Kalaallit Nunaannut timmisartumik angalaneq akisuupilussuuvoq aammalu nunap immikkoortuani imaatigut angalaneq akisuupilussuulluni.

- Taamaammat immikkuullarissumik neqerooruteqarnissaq pisariaqarpoq (akimarpaluttumik, aaqq.), tassunngarusuttullu akileerusussuseqarlutillu piffissamik atuinissartik naatsorsuutigisariaqassavaat, Stenbakken taama oqarpoq.

Aamma atuaruk Kangilinnguit salinneqarnissaa suli isumaqatigiissutigineqanngilaq

Aningaasalersuisussaqanngilaq
Greenland Venture A/S-ip, takornariartitsinermik siornatigut sammisaqarfiusimasup, Kangilinnguit isiginiarsimanngilaa. ‘Ingerlatseqatigiiffiup aningaasalersuinissaminut periusissiaataa iluaniinngilaq, Greenland Venture A/S-imi pisortaaneq Karsten Høy taama ilisimatitsivoq.

Aamma Kommuneqarfik Sermersooq, Kangilinnguani illunik arlalinnik pigisaqartoq aammalu Namminersorlutik Oqartussat Illersornissaqarfiup suliariumannittussarsiuussineranut soqutiginnissimanngillat. Suliariumannittussarsiuussinermi pineqartumi avatangiisinik saliineq aammalu illuutinik isaterineq ataatsimoortinneqarput.

Sukkasuumilli aningaasalersuisoqarnissaa anguneqassappat, taava pissutsit arlallit isumageqqaarneqartariaqassapput, tassungalu ilaavoq Nunatsinni mittarfinnik nutaanik pilersitsiortornissamut pilersaarut.

- Matumunnga aningaasalersuisitsisoqassappat qaqugorpiaq saliisoqassanersoq ilisimaqqissaarneqartariaqarpoq. Qanoq akeqassava? Minnerunngitsumillu, tikikkuminassusia qanoq isikkoqassava? Mittarfiit sumi inissisimassappat? Aamma qanoq takitigissappat? Anders Stenbakken taama erseqqissaavoq.

Aamma atuaruk Peter Barfoed: illunik pitsaalluinnartunik asuli eqqaaneruinnassaaq

Kangilinnguani najugaqarsimasoq Wetlesen, illuliassanik titartaasartoq Barfoed, uumassusilinnik ilisimatooq Buhl allallu 500-t atsiornernik katersinermi 'Grønnedal - Forsvarets "udlysning" af bygninger skal gå om nu'-mi atsiorsimasut Kangilinnguit allatut ilusilerlugit ingerlateqqinneqarnissaat ataatsimoorfigaat.

Taakku isumaqarput Illersornissaqarfiup suliariumannittussarsiuussinini maanna ingerlasoq allanngortittariaqaraa, avatangiisinik saliineq nammineq isumagalugu illuutilli uninngatiinnarlugit immikkut suliariumannittussarsiuullugit.

Nunaminertammi minguitsuunissaa aningaasalersuisartunut pilerinnilersitsissaaq, aamma takornariartitsineq eqqarsaatigalugu, taama isumaqarput. Taamalluarsinnaasorlu Visit Greenlandimi pisortaaneq isumaqarpoq, aamma Illersornissaqarfiup suliariumannittussarsiuussineq avikkumanngikkaluarpaguluunniit.