Kangilinnguit salinneqarnissaa suli isumaqatigiissutigineqanngilaq
Illersornissaqarfiup suliffeqarfiit tallimat neqerooruteqartereerpai. Taakku avatangiisinik saliinissamik Kangilinnguanilu illunik isaterinissanik imaqartut, Namminersorlutik Oqartussat politikkikkut isumaqatigiissusiortoqaqqaarnissaa kissaatigaat.
Qanittukkut Illersornissaqarfik nalunaaruteqarpoq danskit suliffeqarfii sisamat amerikamiullu suliffeqarfiat ataaseq suliarinnittussatut neqerooruteqarnissaminnut akuerineqarsimasut. Suliassat tassaallutik sakkutooqarfiusimasumi eqqaanilu avatangiisinik saliineq illunillu isaterineq. Pinngortitamut avatangiisinut inatsisinillu atuutsitsinermut naalakkersuisoqarfiup Danmark maannakkut politikkikkut isumaqatigiinniarfigaa suliariumannittussarsiuussineq aallartinneqartinnagu.
Aamma atuaruk Peter Barfoed: illunik pitsaalluinnartunik asuli eqqaaneruinnassaaq
Naalakkersuisoqarfik KNR-imut ima allakkatigut ilisimatitsivoq:
"Naalakkersuisoqarfik Illersornissaqarfimmut erseqqissaasimavoq politikkikkut isumaqatigiittoqartinnagu suliariumannittussarsiuussisoqassanngitsoq. Taamaaliornikkut saliinissamut isumaqatigiissutip qanorpiaq imaqarnissaa pillugu isumaqatigiinnissaq qulakkeerneqassammat."
Naalakkersuisoqarfiup ilanngullugu nalunaarutigaa neriuutigineqartoq isumaqatigiissummi erseqqissumik illuutit qanorpiaq isaterneqarnissaannut piumasaqaatit oqaasertalerneqassanersut, aamma avatanngiisinik saliinermut Kangilinnguillu eqqaata atuleqqinnissaanut suut piumasaqaataanersut.
Aamma atuaruk Kangilinnguani saliinissamut suliffeqarfiit tallimat neqeroortussanngortut
Illersornissaqarfiup suliariumannittussarsiuinera qaammatip matuma naalernerani pissangatinneqarpoq, isumaqatigiissuummillu kingusinnerpaamik aappaagu februaarimi atsiortoqarumaarluni.
Illersornissaqarfiup Illuutinik nakkutilliiviata uppernarsarpaa Namminersorlutik Oqartussat isumaqatiginiarneqartut.
Tassanili erseqqissarneqarpoq, suliariumannittussarsiuineq kinguartinneqarnavianngittoq, taamaaliortoqassappalli saliinertalimmik piserusuttumik nalunaartoqartariaqassasoq.
Aamma atuaruk Kangilinnguit siunissaat eqqartuleraat
