Politikki

Qaasuitsup Kommuniata avinneqarnissaata piviusunngornissaa qanilliartortoq

Siumup Inuit Ataqatigiillu inatsisinut ataatsimiititaliami ilaasortaatitaasa amerlanerussuteqarlutik siunnersuutip akuerineqarnissaa inassutigaat.

Allattoq Ivik Kristiansen, Anton Gundersen Lihn

novembarip 15-at 2016 11:49

Inatsisartunilu ilaasortat amerlanerussuteqartut siunnersuut ullumi pingajussaaniigassanngortippaat. Pingajussaaneerneqarnerani akuersissutigineqassanngikkuni itigartitsissutigineqassaaq.

Aamma atuaruk Kommunip avinneqarnissaa:Innuttaasut kissaatigisaat Inatsisartut isumaqatigiissut ilalerpaat

Qaasuitsup Kommuniata avinneqarnissaa kimit akilerneqassanersoq oqallisigineqartupilussuuvoq.

Siunnersuulli naapertorlugu tamanna kommunip nammineerluni akilissavaa.

Kommunip avinneqarneranut atatillugu aningaasartuutit kommunip missingersuutaanit aaneqassasut siunnersuutigineqarpoq.

Inatsisinut ataatsimiititaliaq naapertorlugu siunnersuutip oqaasertai erseqqipput. Ataatsimiititaliarli allat akileeqataasinnaanissaannut periarfissaqartitsivoq. Aningaasartuutit amerlinerulissutaat kommuniulersussanit marlunnit inuiaqatigiinnillu tamanit avinneqartariaqartut ataatsimiititaliamit isumaqartoqarpoq.

Aamma atuaruk VIDEO Inuit Ataqatigiit avinnissaq akerlerigaluarlugu akuerigaat

Demokraatit kisimiillutik siunnersuummut akerliupput. Innuttaasut taasitinneqaramik naammattumik paasissutissinneqarsimanngitsut taakku isumaqarput. Taamaattumik innuttaasut tamakkiisumik paasissutissinneqareerlutik isummernissaminnut periarfissinneqarnissaat Demortaatinit piumasarineqarpoq.

Demokraatit Inatsisinut ataatsimiititaliami ilaasortaatitaat Michael Rosing ataatsimiititaliap isumaliutissiissutaani allappoq, Kommunip avinneqarnissaanut aalajangiinissaq tuaviunneqartariaqanngitsoq, tunngavilersuuteqarluarnikkullu innuttaasut taasitinneqartariaqartut.

Inatsisinut ataatsimiititaliap isumaliutissiissutaani aamma maluginiarneqarput, kommunip avinneqarnissaanut innuttaasunik taasititsinermi aningaasatigut kingunissai soorlu saniatigut aningaasartuuteqarnikkut, kiffartuussinerit ajornerulerneratigut, akileraarutillu qaffatsinnerisigut kommunip avinneqarnerata akilerneqarnissaanut innuttaasut ilisimannissimanngitsut.

Tamatumunnga atatillugu inatsisinut ataatsimiititaliap apeqquserpaa, taasititsineq ullumikkut ingerlanneqartuuppat assinganik inerneqassagaluarnersoq. Taamaakkaluartorli avannaata kommuniata avinneqarnissaanut siunnersuut ataatsimiititaliami amerlanerussuteqartut akueraat.

Siunnersuut novembarip 21-iani pingajussaarneqassaaq.