Kalaallit savalimmiormiullu sakkutuujusussaatitaassanngillat
Kalaallit savalimmiormiullu sakkutuujussussaatitaanermut ilaatinneqanngillat. Issittoq pillugu periusissaq nutaaq isumaqatigiinniutigineqalerpat Dansk Folkepartiip tamanna allanngortikkusuppaa.
Folketingimulli ilaasortat Nunatsinneersut Savalimmiuneersullu tamanna akuerinngilaat.
- Sakkutuunik tunniussaqassagutta aamma sunniuteqaqataasariarpugut, savalimmiormiu Folketingimut ilaasortaq Sjúrður Skaale taama oqarpoq.
- Naalagaaffeqatigiit illersornissaannut tunngatillugu Danmark kisimi aalajangiisinnaatitaavoq. Danmark sorsunnermut peqataassanersoq peqataassannginnersorluunniit Danmarkip nammineq aalajangertarpaa.
Aamma atuaruk Kalaallit savalimmiormiullu sakkutuujusussaatitaanermut naliliiffigineqartalersikkusukkaat
Sjúrður Skaalelli Dansk Folkepartiip siunnersuutaanut piumasaateqarpoq.
- Dansk Folkepartiip sunniuteqaqataanissatsinnik akuerippatigut siunnersuutigineqartoq eqqartorsinnaavarput.
- Savalimmiormiut sakkutuujusussaatitaassappata sorsunnermut peqataanissamut tunngatillugu aalajangiinerni sunniuteqaqataasinnaasariaqarpugut, Skaale oqarpoq, Danmarkillu Irakimut sorsunnissamut peqataanissaanik Savalimmiuni Lagtingip itigartitsisimanera innersuussutigalugu.
Aamma atuaruk Sakkutuunngorusuttut amerliartorput
Dansk Folkepartiip illersornissaq pillugu oqaaseqartartuata Marie Krarupip kalaallit savalimmiormiullu illersornissamut tunngatillugu ilinniagaqarnissaat sakkutuujusussaatitaanikkut qulakkeerneqarsinnaanera, tamannalu pingaartumik sakkutuunit imarsiortunit atorluarneqarsinnaanera tunngavilersuutigaa.
/ritzau/