Sakkutuunngorusuttut amerliartorput
Niels Thomsen Demokraatineersoq isumaqarpoq sakkutuujusussaaneq imaluunniit sakkutuujunngikkaluarluni inuiaqatigiinni kiffartuussisussaaneq oqaluuserisassaqqissoq.
- Upperaarput inuusuttatta nunat allat inuusuttaat assigalugit akisussaaffimmik tiguserusunnerat, Niels Thomsen apeqquteqaat tunngavigalugu oqallinnissamik siunnersuumminut tunngavilersuivoq.
Kisitsisit aamma takutippaat kalaallit inuusuttaat sakkutuunngorusuttut amerliartortut.
- 2005-imi Illersornissaqarfiup qinnuteqaatit aqqanillit tigusimavai 2011-milu maannamuugallartoq 30-t tigusimallugit, Naalakkersuisut siulittaasuat Kuupik Kleist akissuteqaammini allappoq.
Aamma Naalakkersuisut soqutiginartippaat sakkutuujusussaanerup imaluunnit sakkutuujunngikkaluarluni inuiaqatigiinni kiffartuussisussaannerup oqaluuserinissaa.
- Kalaallit uagut nammitsinnik sakkutooqalernissarput eqqarsaatigiuminaappoq. Kisiannili aaqqissuussaasumik sakkutuujusussaatitaasarnerup imaluunniit immaqa taarsiullugu inuusuttut sakkutuujunngikkaluarlutik inuiaqatigiinnik kiffartuussisalernissaannik apeqqutikkut immitsinnut napatissinnaalernissatsinnut periarfissat pissanganartut ammaanneqarsinnaassapput.
Taanna aamma oqarpoq inuiaqatigiinnik kiffartuussisussaaneq aaqqissuunneqarsinnaasut nunatsinni pissutsit ileqqullu aallaavigalugit.
Niels Thomsenip erseqqissarpaa Demokraatit isumaat malillugu kalaallit assersuutigalugu Afghanistanimi sorsuffimmukartinnissaat takorlooruminaatsoq sorsukkiarnissaq kissaatiginngippassuk.
