FN: Kalaallit Nunaata eqqagassanik ulorianartunik akiuiniarnera pitsaanerusariaqarpoq
Nunatsinni uumasut, inuit avatangiisillu nunarsuarmi sumiiffinnut allanut naleqqiullutik mingutsitsinermit imaata sarfaanit Issittumut ingerlaartinneqartumit eqqugaanerusarput.
Nunarpullu taamaattoqarneranit sakkortuumik eqqugaasoq, Naalagaaffiit Peqatigiit immikkut ittumik siunnersortaat, Baskut Tuncak, nunatsinni angalareerluni Naalagaaffiit Peqatigiit Inuttut pisinnaatitaaffiit pillugit ataatsimiititaliaannut eqqagassat ulorianartut sunniutigisartagaasalu akiorniarneqarnissaannut arlalinnik kaammattuuteqarpoq.
Nunatsinnilu oqartussat ullumikkut akiuiniarnermik suliniuteqareeraluarlutik, mingutsitsinerup annikillisarnissaanut iliuuseqarnerusinnaapput, Tuncak Naalagaaffiit Peqatigiit Inuttut pisinnaatitaaffiit pillugit ataatsimiititaliaannut nalunaarusiamini taama allappoq.
AAMMA ATUARUK USA-p sakkutooqarfigisimasaani eqqakkat tamaasa Danmarkip peertariaqarpai
- Namminersorlutik oqartussat naalakkersuisui (Naalakkersuisut, aaqq.) mingutsitsinerup nakkutigineqarnera pillugu nunani tamalaani oqallinnerit eqeersimaartumik peqataaffigisariaqaraluarpaat. Naalakkersuisut kajumissaarneqarput silap pissusiata allanngoriartornerata akuutissallu toqunartortallit pillugit isumaqatigiissutit atassuteqarnerannik nukittorsaaqqullugit, taamaaliornikkut toqunartulinnik siammarterinerup annikillisarnissaanut suliniutit pitsanngorsarumallugit, nalunaarusiami taama allassimasoqarpoq.
Tuncakip - Danmark aqqutigalugu - nunatsinnut kajumissaarutigaa ilaatigut Minamatami Isumaqatigiissummut, kviksølvimik aniatitsinerup annikillisarnissaanik siunertaqartumut ilannguteqqullugu, kiisalu aamma Aarhusimi Isumaqatigiissummut, avatangiisinut tunngatillugu innuttaasut paasissutissanik, aalajangiinernik eqqartuussutinillu pissarsinissaannut qulakkeerinniffiusumut.
Kalaalimerngit, eqqaavissuit piiaaviillu ernumanartoqartikkai
Kalaalimerngillu ulorianartorsiortinneqarnerat siunnersortip erseqqissaatigaa, nunamimi imaanilu uumasut akuutissanik mingutsitsissutaasunik nerisaqartarmata, uumasullu taakku kingorna inunnit nerineqartarlutik.
Taamaattoqarneralu nunatsinni oqartussanit eqqumaffigineqarpoq paasititsiniaanerillu arlallit atorlugit mianersoqqussutigineqarsimalluni.
AAMMA ATUARUK Sermersooq kommunip nunaqarfiini eqqakkanik katersisoq
Eqqagassanilli immikkoortiterisarnerup pitsaanerulersinneratigut akuutissat ulorianartut sunniutigisartagaallu annikillisinneqarsinnaasut aamma kaammattuutigineqarpoq.
- Namminersorlutik oqartussat naalakkersuisui (Naalakkersuisut, aaqq.) najukkami innuttaasunut mingutsitsineq pillugu paasissutissaqarnissaa, eqqagassallu isumaginissaannut naammattunik periarfissaqarnissaa qulakkeertariaqarpaat, akuutissat toqunartortallit siammarsinnaanerisa annikillisaavigineqarnissaat ilanngullugu, nalunaarusiami tamanna atuarneqarsinnaavoq.
AAMMA ATUARUK Danmarkip USA saliinissamut tunngatillugu saaffigisimanngilaa
Kuannersuarnilu uranimik piiaaviliortoqarniarnera tassangaanniillu eqqagassat Naalagaaffiit Peqatigiit nalunaarusiaanni ernumanartoqartinneqarpoq.
- Oqartussat siunissami eqqakkanik tailinginillu katersuivinnik sukumiisumik nakkutilliisoqarnissaanik qulakkeerinninnissamut periarfissaat aamma ernumanartoqarsinnaapput, pingaartumik Kalaallit Nunaanni eqqagassalerinermut tamarmiusumut tunngatillugu unammilligassat eqqarsaatigalugit.