Danmarkip USA saliinissamut tunngatillugu saaffigisimanngilaa
Naalakkersuisut siulittaasuata Kim Kielsenip danskillu avatangiisinut ministeriata Esben Lunde Larsenip sisamanngornermi Københavnimi tusagassiortunik katersuutsisineranni tamanna paasinarsinarsivoq.
Illuatungeriit tusagassiortunik arlaleriarlutik aperineqaraluarput, Danmarkip Kalaallit Nunaanni illersornissamut akisussaasutut USA sakkutooqarfigisimasamini saleeqataassannginnersoq aperisimaneraa.
Esben Lunde Larsen siulliulluni nikingalaartumik akivoq.
- Amerikamiunut isumaqatigiissutit matumunnga attuumassuteqanngillat. Saliisoqarnissaa siunertaralugu danskit naalakkersuisui Kalaallit Nunaannilu naalakkersuisut isumaqatigiissuteqarput. Danskit naalakkersuisuisa ajornartorsiutaasut iluarsineqarnissaannut aningaasaliillutillu immikkut ilisimasalinnik suliaqartitsissapput.
AAMMA ATUARUK USA-p nunatsinni suliai ernumalersitsipput
Saliinissamut isumaqatigiissut:
-
Kalaallit Nunaanni USA'p siornatigut sakkutooqarfigisimasaani saliinissamut danskit naalakkersuisui koruuninik 180 millioninik ukiuni arfinilinni atugassanik immikkoortitsisut.
-
Nakkutilliisuutitat Kalaallit Nunaanniit Danmarkimiillu inuttaqartinneqartup saliiffiusussat aalajangertassavai. Sumi, qaqugu qanorlu suliarineqassanersut aalajangertarlugu.
-
Isumaqatigiissummi pineqarput sorsunnersuup kingulliup nalaani amerikamiut sakkutooqarfigisimasaat. Illersornissamut isumaqatigiissummi 1951-imeersumi Danmarkip USA Kalaallit Nunaanni sakkutooqarfiliornissaanut allanullu piginnaatippaa.
-
Sanaartugassanik suliassinneqartartut saliiffissatut toqqakkani saliisuusassapput.
-
Isumaqatigiissummi sakkutooqarfiit allatut isumaqatigiissuteqarfigineqarsimanngitsut pineqarput. Maannamut pineqartut tassaapput assersuutigalugu Tasiilap eqqaaniittoq Ikkatteq aamma Nuup kujataaniittoq Marraq.
-
Sakkutooqarfiit maannakkut atuuttut isumaqatigiissummi pineqanngillat. Soorlu Pituffik, danskillu maannakkut sakkutooqarfigisaat, soorlu Kangilinnguit, Daneborg aamma Mestersvig.
-
Saliinissamut isumaqatigiissummut Camp Century aamma ilaanngilaq. Taanna ilisimatuut maannakkut nakkutigisaralugulu avatangiisinik mingutitsinera assiliorpaat.
Paasisat: Avatangiisinut inuussutissanullu ministerip Naalakkersuisullu siulittaasuata amerikamiut Kalaallit Nunaanni sakkutooqarfigisimasaanni saliinissamut isumaqatigiissutaat.
Kalaallit Nunaata tungaaninngaanniit arlaleriarluni eqqaaneqartarsimavoq, Danmark amerikamiut Kalaallit Nunaanni qimaannagaannut akisussaassutsimik tigusisariaqartoq; Danmarkimi taannaammat USA'p Nunatsinni sakkutooqarfeqalernissaanik akuersisuusoq.
Tusagassiortunut Kim Kielsen ima oqarpoq:
- Amerikamiut isumaqatigiissuteqarfiginngilagut. Danskit naalakkersuisui atsioqatigiissuteqarfigaagut, taannalu toqqammavigissavarput.
Tusagassiortunik apeqqutigineqarmat iluamik paasinninnerunersoq saleeqataanissaq siunertaralugu ilumut USA-mik oqaloqateqarluniluunniit isumaqatigiinniartoqarsimanngitsoq, Kim Kielsen akivoq:
- Aap.
Kalaallit Nunaanni amerikamiut sakkutooqarfigimasaanni saliinissamut ukiuni tulliuttuni arfinilinni atugassanik Danskit naalakkersuisui aalajangersimapput 180 millioner koruuninik immikkoortitsiniarlutik.
AAMMA ATUARUK Saliinissaq pillugu isumaqatigiissuteqarnera allagaatitoqqami paasineqartoq
