Aviisimi allaatigisaq: Kalaallit Nunaat Pituffik pillugu nutaamik isumaqatigiissusiortariaqarpoq
Atuakkiortoq siornatigullu USA-p Nunatsinni sakkutooqarfiisa nakkutiginerinut komitémi ilaasortaasimasoq, Hans Jakob Helms, Jyllands Postenimi allaatigisamini ullumi taama allappoq.
Danskit nunanut allanut tunngasunut ministeriata Folketingimi juulli sioqqutilaarlugu matoqqasumik isumasioqatigineqarneranut atatillugu taama nalunaaruteqarpoq.
Pituffimmi kiffartuussinissamik isumaqatigiissut pillugu USA-mut isumaqatigiinniarnerit qanoq ingerlanersut Folketingip Kalaallit Nunaannut tunngasunut ataatsimiititaliaata ataatsimiinnermi paaserusuppaa.
Ataatsimeeqataasullu arlallit naapertorlugit ataatsimiinneq nutaarsiassartaqanngilaq.
AAMMA ATUARUK Nutaarsiassartaqanngilaq
Hans Jakob Helms taamaammat allappoq kiffartuussinissamik isumaqatigiissutip puiguinnarnissaa piffissanngortoq, tamatumunngalu taarsiullugu USA-p Nunatsinnut ”fair share”-mik tunniussinissaanut periarfissat misissorneqartariaqartut, Nunatta pissarsiaqarnissaa Pituffik pillugu isumaqatigiissummi pioreersumi t USA-mit Danmarkimiillu tunngaviatigut akuersissutigineqareermat.
Assersuutigalugu Nunatta aqqutilersuutitigut annertuumik aningaasalersuinissamik pisariaqartitsinera, kiisalu suliffissuaqarnermik ineriartortitsinissamut periarfissaqarnerunissaa erseqqissaatigaa.
AAMMA ATUARUK Pituffik-radar opgraderet for knap halv milliard kroner
Immaqa aamma nunatta sineriaani imaata assiliornera, danskit naalakkersuisuisa Geodatastyrelsimik nuussinerisa kingorna ukiunik arlalinnik kinguaattoorfiusoq USA-p isumagisinnaaruttoraa? Helms Jyllands Postenimi taama allappoq, imalu naggasiilluni:
Periarfissanik ulikkaarpoq. Pisaqarporli nutaanik eqqarsarnissaq, Pituffimmilu kiffartuussinissamik isumaqatigiissutip amerikamiut suliffeqarfiutaannut annaanerata kimit pisuussutigineqarnera Danmarkimit Kalaallit Nunaannillu assortuussutigiunnaarneqarnissaa.
AAMMA ATUARUK Nutarterisarsimanerit USA-p ukiumut nalunaarusiaani atuarneqarsinnaapput
