Greenpeace: Kalaallit Nunaanni uuliasiorluni qillerititsiniarneq unitsilli
Avatangiisinik illersuiniaqatigiiffik Greenpeace taama isumaqarpoq. Illersuiniaqatigiiffiup tusagassiorfinnut nalunaaruteqarluni Nunarput kingumut kajumissaarpaa sinerissap avataani uuliasiorluni qillerinissamik pilersaarutit unitseqqullugit.
Aatsitassanut naalakkersuisup, Muté Bourup Egedep, Baffinip Kangerliumarngani Davis Strædemilu uuliasiornissamut akuersissutinik qinnuteqarnissamut ingerlatseqatigiiffinnik Londonimi sapaatit-akunnerata siuliani pilerisaarinerata kingorna taama kajumissaaruteqarpoq.
Naalakkersuisut paasisariaqalerpaat uuliasiorluni qillernermut aningaasalersuinissamut piffissaajunnartoq, Greenpeace taama isumaqarpoq.
- Oqaluttuarisaanermi pisarsimasut eqqarsaatigalugit, uuliap akia siumut naatsorsoruminaallunilu allanngorartupilussuusarpoq, ukiunili makkunani maluginiarneqarsinnaasoq tassaavoq nukissiuutinik ataavartunik atuinerup annertusiartuinnarnera uuliallu piumaneqarnerata milliartornera, aamma silap pissusia pillugu isumaqatigiissut annertooq Parisimi atsioqatigiissutigineqarsimavoq.
AAMMA ATUARUK Uuliasiortitseqatigiiffiit pilerisaarneqarput
Nukissiuutinik ingerlatseqatigiiffiit arlalissuit, ilaatigut Shellip, Maersk Oilip, Statoilip Dong Energyillu uuliasiornissamut akuersissutit pigisatik Namminersorlutik Oqartussanut ukiuni kingullerni utertiinnarpaat.
Tamanna uuliamik qalluinissap akilersinnaajunnaarneranik pissuteqarpoq, nunarsuaq tamakkerlugu uuliap akii 2014-imiilli apparaluttuinnarsimammata.
Naalakkersuisut tusagassiorfinnut nalunaarutaat naapertorlugu nunani tamalaani ingerlatseqatigiiffissuit arlallit Londonimi sapaatit-akunnerata siuliani pilerisaarisoqarnerani peqataapput.
AAMMA ATUARUK Uuliasioqatigiiffiit Kitaata imartaanit qimarrattut